WILLEMSTAD.- R.B. su kaso a keda tratá ayera despues ku el a keda pospon’é na desèmber pa mas investigashon. Ministerio Públiko ta akusá B. ku dia promé di yüli último el a menasá un damita di fam S. ku ta yu di su señora i a uza violensia pa asina e kometé aktonan seksual ku e damita entre otro penetrashon. Segun deklarashon di e damita e hòmber lo mester a purba tapa su boka, uza forsa brutu kontra dje his’é i push’é, kue tene na su garganta  i bai kuné den un kamber di hotèl i sera e porta di kamber na lòk. Segun e damita e hòmber lo  tabata menas’é i a bis’é ku e tin ku hasi sèks kuné, òf amor i a poné riba kama i a sker su panty for di su kurpa i a tene man di e damita duru i hink’é den un  situashon hopi menasante.   B. a ninga tur e akusashonnan, i a bisa  ku  e tin un relashon ku e damita pa basta tempu i ku nan sa hasi sèks vários bia. Ayera hues a duna di konos’é ku e mama di e damita ku ta pareha di B. a deklará ku e akusado a mira e damita krese i ku su yu tabata mir’é manera un tata.  Tambe e mama a deklará ku debí ku su yu tabatin mester di sèn e tabata bai traha ku B. na un hotèl pa hasi limpiesa. Aki ta kaminda B. lo a probechá di e situashon i  violá e damita.  Segun hues riba e fecha menshoná  e damita ku B. tabatin un diskushon tokante limpiesa di kual a bin forsegeo entre nan. B. lo mester a agredié di kual e damita lo mester a kai i kap su lep. Durante e kaida e damita ta bai flou i ora el a habri su wowo el a hañ’é den kamber di e akusado.  B. a drenta den e kamber i a   forsa e damita pa hasi sèks kuné. Despues di esaki e ta saka su potrèt den panty.  Hues a bisa ku B. a deklará na polis ku e damita a hasi sèks kuné pa 700 florin. Segun B. ta normal ku nan sa tene relashon i ku e ta duna e damita sèn komo regalo. B. a duna di konos’é ku el a regalá e damita wasmashin, telefòn i a traha un pida kamber pe. Tambe B. a deklará ku e sa tin mas relashon ku e otro damita nan ku sa bin na e hotèl kaminda e ta traha.  Ayera B. a ninga redondamente ku nunka e no a forsa  e damita pa hasi sèks.  Segun e akusado e tabatin outoridat di seguridat na e hotèl.  E dia ei e damita lo mester a halsa su bos di kual el a bis’é pa keda ketu mirando ku tin turista. E damita lo a bis’é ku e no por mand’é keda ketu i ta dal e moketa den su kara. Aki e lo mester a kue e damita na su garganta i push’é hink’é den kamber. Segun B, el a bai bin bèk i a haña e damita ainda den kamber. Aki e lo mester a bis’é ku eigenlijk e kier a dun’é sèn i ku e kier a tene relashon  kuné. Boluntariamente e damita a bis’é pa nan hasi sèks ya e ta dun’é su sèn. Segun B. ora ku nan a kaba e damita a bis’é ku e ta bai laba su parti abou pa motibu ku su frei ta kontrol’é. Ora ku nan a kaba e lo  mester a duna e damita 100 florin wardando su doño di trabou bin pa e kobra pe duna e damita e sobrá 600 florin. Esaki segun e akusado lo mester a pone e damita bira furioso i a kuminsá e diskushon.