WILLEMSTAD.- Korte di promé instansia a deklará e hòmber C. Martis akusá pa intento di asesinato, liber di tur kulpa.  Martis ta keda  akusá di a hinka su eks (ku ta di mesun sekso) ku un opheto skèrpi dia 15 di sèptèmber aña pasá na altura di viadùkt.

Na novèmber 2019 polis a detené Martis, despues  ku e víktima a hasi denunsia.

Martis a insistí ku e no tabatin kuchú i no a hinka e víktima. El a bisa ku durante forsageo vários bòter di glas a kibra i e víktima a kai kòrta su kurpa.

Vários bia e kaso a keda posponé den korte, pa motibu ku e investigashon no tabata kla. Segun fiskal,  e akusado a deklará na polis ku tabatin yen menasa riba facebook kontra dje i a  mustra polis  tur kos.  Den e kaso di pro forma, hues Edelenbos a bisa ku ainda tabata falta pa hasi basta investigashon, relashoná ku mas akusashon  di e víktima.

Hues  a pidi  pa skucha algun testigu i tambe pa kaba di hasi e investigashon. Relashoná ku e echo ei, hues a bai di akuerdo pa suspendé detenshon di e akusado pa warda tratamentu di e kaso.

Resientemente e kaso mester a keda tratá, pero Ministerio Públiko a pidi pa deklará e akusado liber di kulpa, mirando ku no a hasi investigashon pa sa sigur ku e herida ku e víktima tabatin ta di kuchú òf di e glasnan ku a keda kibrá. Fiskal a bisa ku riba e video no por a mira e akusado ku kuchú den su man.

Esnan ku a deklará komo testigu, tambe a bisa ku nan no a mira Martis ku kuchú den man.

Mirando ku e investigashon no tabata muchu kla, no a keda Ministerio Públiko nada mas di deklará e akusado liber di tur kulpa.

Hues Edelenbos den su desishon a bai kompletamente di akuerdo ku fiskal.