Fiskal no por a proba e akusashon

WILLEMSTAD.- Fiskal Dennaoui-Simon a pidi korte di promé instansia deklará G. Damascus(23) akusá pa intento di asesinato liber di tur kulpa.

Damascus ta keda akusá di a trata na kita bida di e pareha di su eks di fam Coffie dia 1e yüli 2020, dor di hink’é vários bia ku un eispik den su barika. E víktima a keda gravemente leshoná. Algun luna pasá su detenshon a keda posponé pendiente tratamentu di su kaso.

Durante tratamentu di e kaso e akusado a bisa ku e no ta esun ku a hinka e víktima.

El a bisa ku e tabata bou di menasa di su amigu Alex ku ta esun ku a okashoná e problema i ta Alex ta esun ku a hinka e víktima.

“El a bisa mi pa mi no bisa ku ta e, sino kos lo pasa mi”, segun Damascus.

Mas aleu Damascus a deklará ku den promé instansia el a keda ketu, pero despues el a papia ku su mama di kriansa pa bis’é ku e no ta sinti su mes bon pa loke su amigu a hink’é aden i e señora a bis’é pa e deklará e bèrdat.

El a splika ku e tabata den un proseso pa wak su yu.

E mama di su yu ke mira sèn di alimentashon.

Pero e pareha nobo di mama di su yu (ku a resultá di ta e víktima Coffie), ta entremeté hopi ora ku e tin ku wak su yu.

Despues di a yega na un akuerdo pa wak yu, e promé bia a bai bon pero despues e kosnan a bai kompletamente robes.

Kada bes ora e tin ku wak yu, e hòmber ta kue e mama i e yu sali kuné òf ta bin ku vários esküs.

Pero na polis e víktima a deklará ku kada bes Damascus top’é riba kaya, e ta molesti’é.

Damascus a ninga redondamente.

Segun Damascus riba e dia en kuestion, ta su amigu Alex a hinka e hòmber.

El a splika den un kòmbersashon el a konta Alex den kiko e tabata pasa pa wak su yu.

Alex  no a gusta loke el a tende i a bis’e ku mester yega un fin na e asuntu aki.

Esaki a pone ku Alex a bai kuné pa wak e yu, pero e no tabata sa ku e ta’tin kuchú riba dje.

Segun Damascus estando ei nan a surgi un diskushon entre e i Coffie i dado momento Alex a hinka e víktima i Damascus na su turno a sali kore bai.

Despues di e suseso Alex a bis’e pa e tuma tur kos riba dje.

El a splika ku su suegra aktual a mira kon e amigu a kue e kuchú.

A skucha e señora i el a deklará ku bèrdat el a mira kon Alex a kue e kuchú den kushina bai kuné.

Despues Alex mes a atmití di a hinka e víktima.

Fiskal Dennaoui durante su rekisitorio, a splika ku e no sa ken a hinka e víktima.

El a bisa ku e víktima mes a deklará ku ora e tabata bringando ku Damascus i su amigu, el a sinti un friu den su barika pero a keda bringa ku nan.

Dado momento e no por a wanta e doló mas i a sak den otro.

Fiskal a bisa ku Damascus promé a deklará tantu na polis komo na hues komisario, ku ta e a hinka e víktima, pero despues ta kambia su deklarashon i bisa ku e tabata bou di menasa di Alex pa tuma tur kos riba dje.

Alex tambe a wòrdu skucha i a ninga di a hinka e víktima. Segun fiskal mirando tur esakinan e no tin sufisiente prueba pa kulpa Damascus i p’esei ta deklar’é liber di tur kulpa