Fiskal no por a saka afó ken ta  papia bèrdat

WILLEMSTAD.- A. Samboe (25) a keda deklará liber pa un kaso di kapmentu ku machete. Ayera Samboe no a presentá den Korte, pero su kaso a keda tratá den su ousensia.

Samboe ta keda akusá di a maltratá su víktima un hende hòmber di fam Elvira ku un machete dia 27 di òktober 2019. Segun e denunsia, Samboe a zuai e machete ku forsa riba Elvira ku e konsekuensia ku e víktima a risibí un kòrtá na su garganta, su palma di man i dede.

Momentu di su akshon, Samboe a grita e víktima,  "ami si no ta hasi wega".

Elvira a deklará na polis ku Samboe tin un relashon amoroso ku un tal Katy  ku mester a paga e víktima su señora 80 florin.

Pero kada bes tabatin un “smoesje” pa e paga. Esaki ta motibu ku Elvira a bai kas di Samboe i a bis’é pa bisa Katy manda e sèn pa su señora. Segun Elvira e akusado a bis’é ku no tin nada pe.

Aki a surgi un diskushon entre nan i Samboe ku a bai kue su machete i bin riba dje.

Segun Elvira, Samboe a keda a zuai e machete riba dje ku e konsekuensia ku el a risibí kòrtá.

Katy a deklará na polis ku ta 35 florin e tabata debe e señora di Elvira, pasó el a hasi kabei pe i e sobrá el a deskontá.

Na polis Samboe a deklará  ku Elvira a bai den su outo i regresá ku un yabi pa habri bout di wil di outo i a dal e  kuné riba su lomba durante diskushon.

Un testigu a duna di konosé ku el a mira ku Elvira a dal Samboe ku e yabi riba su lomba.

Fiskal durante su rekisitorio a bisa ku e denunsiante a  deklará ku el a bai kas di akusado pa kobra su kasá e sèn.

E akusado a sali ku machete riba dje i kòrt’é na su garganta i man.

Nan a kuminsá bringa i e denunsiante a bai riba  akusado i dal e ku e yabi di lòs bout di wil di outo riba su lomba.

Segun fiskal tin dos historia diferente i p’esei e ta duda ken ta esun ku a kuminsá paso tur dos ta tirando falta riba otro i fiskal no sa ken ta papia bèrdat.

Mirando tur esakinan e ta deklará Samboe liber di kulpa. Hues den su desishon a bai di akuerdo ku fiskal.