WILLEMSTAD.- Korte un bia mas a trata otro kaso lamentabel di inmoralidat kontra di un menor. Ministerio Públiko ta akusá J.R.(42) nasé na Jamaica, di a mishi ku yu di su kolega di apénas 15 aña . Segun e akusashon, J.R. a uza menasa i violensia kontra e menor pa asina oblig’é, hasi aktonan di inmoralidat kuné, den tur sentido di palabra.
El a bai ku e damsita na un sitio alehá den su vehíkulo i einan e kue tene, trèk su panty abou, drumi abou i obligá e damita pa bin serka dje.
Segun deklarashon di e damita, el a trata na kore bai, pero mirando e peso i e altura di e akusado, e no por a logra skapa.
Tur kos a kuminsá na momento ku mama di e damita, a pidi e akusado ku ta su kolega, pa bai buska su yu na skol pe. Segun deklarashon di e mama, nan ta traha huntu den un kompleho di e apartamentu i e akusado tabata e hardinero di e lugá. E tabatin un par di dia ousente di trabou i dado momento el a haña tende, ku doño di e kompleho tabata biniendo Kòrsou, huntu ku su famia i algun bishitante.
Esei a pone ku mama di e damita, mester a traha di dia i anochi pa hasi limpiesa di tur e apartamentu nan i p’esei no por a buska su yu for di skol. El a bisa di a pidi su kolega J.R. a base di konfiansa, pa buska su yu pe, durante un siman largu.
Despues di algun dia, direpente e mucha a kuminsá bai skol poko “slordig”, i hóbennan tabata tent’e. Esei a hala atenshon di personal di skol, ku a puntra e hóben kiko ta pasando kuné.
Aki el a konta e aktonan di inmoralidat, ku e kolega di su mama a kometé kuné.
E personal di skol a yama mama di e menor i pone na altura. E mama a hasi denunsia na polis. E kaso ayera a keda presentá proforma.
E akusado a ninga di a mishi ku e hóben. El a splika ku ora el a buska e mucha for di skol, e mucha tabata kont’e di sierto problemanan emoshonal, ku e tabata konfrontá. Den un di e biahanan ei, e mucha a baha su karson i a kue tene na su “trainingspak”. Dor di e akto aki, su karson a baha i saka su parti íntimo. El a bisa di a hala e mucha un banda i bis’e ku e no tin erekshon, paso e no ta sinti nada pe.
E menor a deklará na polis ku ora e hòmber tabata busk’e fo’i skol, e tabata tira man riba dje i mishi na su partinan íntimo. E hòmber a ninga tur esakinan.
Debí ku e akusado ta ninga e akusashonnan, fiskal a bisa ku mester hasi un prueba di DNA kuné.
Hues na su turno a bisa fiskal, mirando ku e menor tin vários rapòrt ku ta bisa e tin basta problema sikológiko últimamente, e ta pidi pa hasi un investigashon mas profundo, pa wak si e loke nan e menor ta papia, ta kosnan real òf inventá.
Hues a indiká mas aleu, ku mester hasi un investigashon, pa wak si e menor tabata troumatisá promé ku e suseso tuma lugá, òf tabata víktima kaba di un otro violashon i ke tira e falta, riba e akusado.
Segun rapòrtnan sikológiko, e menor ta yora hopi, ta mustra basta troumatisá i no tin smak di hasi nada.
Hues a trese un posposishon, pa hasi un rekonstrukshon den e akusado su outo, uzando un pòpchi, pa trese klaridat den e akusashonnan. E kaso a keda posponé te dia 3 di sèptèmber henter mainta.