Segun akusado hòrtamentu di cheiba a okashoná morto di “Kòrsou Grandi”

WILLEMSTAD.- Korte di promé instansia ayera a trata kaso di e akusado D. Merced (34) akusá di a tira e víktima Micheal Mercera alias “Kòrsou Grandi” mata i a okashoná morto tambe di Jurensly Martina dia 8 di aprel 2018 riba kaminda di Westpunt.

Tambe e ta keda akusá pa poseshon di arma kandela.

E kaso ayera a keda trata parsialmente debí ku e akusado ta insistí pa skucha un testigu ku e ta konsiderá klave den su kaso.

Su abogado Athena Sulvaran a bisa tambe ku e no a kaba di lesa e dosié final i no a papia ku su kliente ampliamente.

Hues ta bai di akuerdo pa posponé e kaso pa skucha testigu ku e akusado ta konsiderá komo klave i krusial.

Banda di esaki, djaluna último a haña un telefòn den e sèl di e akusado.

El a bisa ku esei ta kuadra i ku e telefòn ta di dje.

Segun e akusado ta un gai ku tabata den su sèl a bai kas i a laga e telefòn pe.

E tabata papia solamente ku su kasa riba e telefòn, tokante su yunan.

Pa loke ta trata e suseso, hues a bisa ku e dia ei e víktimanan Mercera i Martina tabata sintá den e outo ku a dal kontra di un palu na Soto.

Tur dos tabata gravemente heridá. Nan a  wòrdu hiba hospital i despues tur dos a fayesé.

Segun e akusashon e akusado a tira riba outo di Michael Mercera ku tabata shofùr i tabata huntu ku Jurensley Martina .

E akusado lo a tira dirigí riba e shofùr, pone ku el a kore bai dal den un palu di indju ku e konsekuensia fatal.

Relashoná ku e aksidente Martina a haña hopi sla i a keda gravemente heridá i fayesé.

Na promé instante polis a kere ku tabata trata di un aksidente ku morto, pero despues di investigashon a konsiderá e kaso komo asesinato.

For di investigashon ku polis a hasi na e sitio a resultá ku probablemente shofùr di e vehíkulo a pèrd’é kontròl riba stür, dal kontra bòrchi di tráfiko, baha for di kaminda dal den un palu di lus pa despues bai dal den e palu di indju.

Dor di e impakto aki e shofùr a keda pegá den e vehíkulo i e okupante a risibí leshon na su garganta.

Durante investigashon, polis a konstatá ku tabatin perforashon di bala na e vehíkulo.

Por a mira ku e shofùr tabatin herida di bala na su skouder robes. Polis a haña i konfiská dos (2) ’huls’, den e área menshoná.

Mercera tabatin un bala i den e porta di e outo a mira ku e bala a pasa stret bai dal e. E bala a drenta na skouder i kousa daño den e kurpa.

Ayera Merced a bisa ku e no tin nada di aber ku e kaso.

El a splika ku e mes no konosé Micheal, ta despues el a tende di dje.

E ku Micheal no tabatin problema ku otro.

E dia ei, el a bai Sta Crus pa bai ranka bròmer. Despues ku su tayer a bira keshi el a bai para kantu.

E tabata para un banda di e kaya i Jandre ku ta esun ku supuestamente lo a tira e víktima, tabata para otro banda di e kaya.

Hues dado momento a indiká na Merced ku e ta keda asombrá di tende ku Jandre tabata tei, paso esei ta promé bia ku e ta trese dilanti.

E akusado a bisa ku ora nan tabata para einan, un outo a kore bin riba nan i hera di basha su bròmer abou.

E shofùr ku a resultá di tabata “Kòrsou Grandi “, a bula abou i el a bai reklam’é na e toko ku el a hera di basha su bròmer abou.

Segun e akusado, nan a kuminsá bati boka ku otro pero un gai a bin para nan i bis’e ku e gainan ei ta gai nan di Bándabou i ku nan ta gainan brutu.

Despues el a bai para bèk na su bròmer i bandoná e sitio. Segun e akusado el a bai kas i despues di 20 pa 30 minüt, Jandre a bin serka dje.

Ora el a drenta sinta den su outo, Jandre a kuminsá bisé ku e ku “Kòrsou Grandi” tabatin un problema masha dia di un hòrtamentu di cheiba i ku e tabata slùip e víktima ratu kaba.

El a bis’e ku tabata nèt bon ku el a kue diskushon kuné i pa nan harma un kos pa likid’é.

Merced a bisa ku el a ninga e lokual ku Jandre a pidié pa partisipá den e likidashon. Segun Merced el a splika Jandre ku su kasa ta na barika i no ke tin problema. El a bisa ku Jandre a kuminsá yam’e homo i insult’é. E na su turno a baha fo’i outo laga su telefòn atras sin sa i esei tabata e fayo di mas grandi ku el a kometé paso ta pa e motibu ei e ta den problema aworakí relashoná ku e kaso.