Despues di 7 interogashon akusado a deklará

WILLEMSTAD.-  E akusado D.Merced (34) su kaso a keda posponé pa dia 3 di sèptèmber próksimo.

Merced ta keda akusá pa dòbel asesinato dia 8 di aprel 2018 riba kaminda di Westpunt.

E kaso a keda presentá pro forma. Segun e akusashon e akusado a tira riba outo di Michael Mercera ku tabata shofùr i tabata huntu ku Jurensley Martina.

E akusado lo a tira dirigí riba e shofùr pone ku el a kore bai dal den un palu di indju ku e konsekuensia fatal.

Relashoná ku e aksidente Martina a haña hopi sla i a keda gravemente heridá i fayesé.

Na promé instante polis a kere ku tabata trata di un aksidente ku morto, pero despues di investigashon a konsiderá e kaso komo asesinato.

Dor di e impakto aki e shofùr a keda pegá den e vehíkulo i e okupante a risibí leshon na su garganta.

Durante investigashon, polis a konstatá ku tabatin perforashon di bala na e vehíkulo ku a kousa morto di “Kas Grandi”.  E dia ei tabatin diskushon entre Merced i “Kas Grandi” na un toko chines na Soto.

Dado momento e diskushon a bira asina fuerte i Merced lo a bisa Mercera ku e ta bai bin tir’e.

Despues di algun ratu un persona ta tira riba e vehíkulo di Mercera ku e konsekuensia ariba menshoná.

Merced a bisa ku el a bai kas i despues ku Jandre a sali serka dje na kas i ku el a laga su telefòn den outo, siguiente dia  mainta Jandre a trese su telefòn pe i a puntr’e ku el a tende kiko a pasa ayera i ku ta e ta para tras di e kos.

E akusado a bisa ku yen  hende a kuminsá app e puntr’e si ta e a mata e hòmbernan.

El a bai reklamá Jandre i bis’e wak kon e ta hink’e den problema.

Despues Jandre a kuminsá menas’é pa wak e no bai hasi homo.

Despues ku e kosnan a kuminsá bai media, Jandre  a bolbe bin serka dje i bis’e ku e tin ku dune tur dos su telefònnan.

Ora el a puntr’e  pa kiko, el a bis’e ku e ta deshasí fo’i nan, paso si e mester kai será e ta sera e tambe.

Hues a puntra e akusado dikon e no a bai polis i bisa esei, e akusado a bisa dor ku e ta dil den droga e no ke tabatin nada di aber ku polis.

Na sèptèmber di 2018 a tira Jeandre mata, na “Flor di  Noruega”.

Testigunan a bisa ku ta e dia ei nan a tende Merced bisa e víktima  “Kòrsou Grandi” ku e lo bai sa, ku e lo bai mira ken e ta.

Segun polis, den e promé deklarashonnan e akusado a hasi uzo di su derechi keda ketu.

Ta despues di 7 interogashon el a bin ku henter e istoria ora el a tende ku e telefòn ta inkriminante i a bisa ku ta Jandre a kometé e akto. Segun un pareha testigu, nan a presensiá e diskushon i despues ora ku nan tabata bayendo kas, un outo blanku a kore pasa nan riba velosidat haltu. Despues nan a mira e outo di víktima di dal kontra di un palu.

Hues a bisa ku mama i tata di Jandre a deklará ku nan yu tabatin un outo blou i nunka tabata kore den e outo di hür òf blanku.

Tampoko e no sa bai e chino na St Crus manera e akusado a bisa.

Nan a bisa ku ta paso Merced sa ku nan yu a wòrdu asesiná, e ta gaña riba dje.

Na 2008 i na 2010 Jandre i Merced a kai será huntu. Hues a posponé e kaso pa dia 3 di sèptèmber binidero.