WILLEMSTAD.- Korte di promé instansia anteriormente a posponé kaso di e hòmber K. Sambo (29) akusá pa 3 echo kastigabel, pa skucha algun persona.
Sambo ta keda akusá pa plantashon di 243 mata di mariwana, ladronisia di koriente i tambe hòrtamentu di awa.
Den pasado Sambo a keda apsolvé di un kaso similar. Polisnan despues di a haña un tep, a presentá na e adrès en kuestion den área di Banda Bou, kaminda nan a tene un entrada hudisial. Nan a yega na un kas den kual e akusado tabat’ei. Durante investigashon, polis a deskubrí kabelnan den e kura ku tabata mustra basta sospechoso.
Na momento ku e agentenan a sigui e kabelnan pa wak unda nan ta bai, nan a bin dal den e plantashon di mariwana den un mondi ku tabata keda kasi 500 meter for di e kas ku e tabata.
Sambo a bisa ku e no tabata sa ku tabatin plantashon di mariwana riba e tereno. El a splika ku el a haña e tereno serka un hòmber ku algun tempu pasa a fayesé. El a kuminsá ku krio di bestia i tabatin plantashon di por ehèmpel palu di koko i banana.
Segun Sambo ta na e momento ei, e tambe a deskubrí ku e kabelnan di awa i koriente tabata bai kaminda e plantashon di mariwana tabata.
Hues a sigui relatá ku un hòmber di fam V. sospechá di tabata esun ku lo tabata sòru pa e matanan di fruta i e bestianan pa e akusado, a bisa polis ku e plantashon di mariwana ta di dje pa su propio uso.
E hòmber aki tambe a keda detené durante entrada hudisial i tabata huntu ku e akusado na e sèlnan di barber.
Durante su interogashon na polis, V. a deklará ku el a keda sekuestrá pa e ruman muhé di Sambo i dos amigu di Sambo.
Nan a menas’é pa bisa ku e plantashon ta di dje.
Segun V. durante ku nan tabata den sèl na Barber un di e bewakernan a trese telefòn pa e akusado hasi uso di dje.
Mirando e deklarashonnan di e víktima, hues a bai di akuerdo pa posponé e kaso, pa asina interogá e ruman muhé di e akusado i su amigunan.
Tambe Ministerio Públiko ke hasi un investigashon tokante uso di e telefòn na Barber.
Riba tur esakinan e akusado mes a ninga ku tabatin sekuestro i tambe uso di telefòn na Barber.
Korte lo kontinuá awe ku e kaso pa sa kiko tin di bèrdat.