Testigunan a kambia nan deklarashonnan vários bia

WILLEMSTAD.- E akusado U. Revierre (42) ayera a keda apsolvé di menasa ku morto.

Rivierre ta keda akusá di a manda outo riba algun persona dia 27 di ougùstùs 2017.

Testigunan a deklará na polis ku e akusado lo a manda un pikòp marka Ranger riba  e personanan i bou di menasa el a grita nan “Mi ta mata bosnan”.

Segun e vershon, e dia ei tabatin un diskushon entre e akusado i algun persona ku tabata biba den e kurá di kas kaminda e suseso a tuma lugá.

Dado momento a surgi un problema entre nan kaminda menasa lo a kai.

Esei tabata e motibu ku Rivierre mester a presentá den sala di korte ayera pa responsabilisá su mes pa su akto. El a bisa ku niun momento so el a manda outo riba e hendenan.

Fiskal de Groot a splika ku tabatin algun testigu ku a deklará ku tabatin menasa i mandamentu di outo, pero despues nan a kambia nan deklarashon na vários okashon.

Segun fiskal, e no sa si loke e hendenan ta akusá e hòmber, ta kuadra ku bèrdat.

Tabatin un di e testigunan ku a bisa ku nan tabata bou di preshon di otro dos persona ku despues ku a deklará kontra e akusado. Ministerio Públiko no por a lokalisá e personanan aki pa duna nan di dos deklarashon.

Mirando tur esakinan fiskal a  duna di konosé ku no a ked’é nada otro di apsolvé e akusado di tur kulpa.

Hues den su desishon a bai kompletamente di akuerdo ku e demanda di fiskal.