WILLEMSTAD.- E hòmber R. Martinus. (25) ku a keda apsolvé di tur kulpa den e kaso di 20 atrako, a bai korte ku Ministerio Públiko i eksigí pago pa daño perhuisio.
Ta trata di un kaso kual 10 persona a keda akusá di a kometé un total di 20 atrako den bibiendanan rònt Kòrsou.
Martinus a keda será un kantidat di 103 dia relashoná ku e kaso aki. Durante un kaso ku a keda presentá pro forma, su abogado mr Athena Sulvaran a logra suspendé su detenshon pendiente e tratamentu integral bou di vários kondishon, despues ku hues a haña ku no tabatin sufisiente motibu pa e keda será.
E.R. su nòmber a keda menshoná durante algun deklarashon komo un di esnan den e grupo ku tabata kometé e atrakonan den union.
Segun e akusashonnan, e akusadonan tabata drenta kas di e víktimanan den oranan di mardugá tur na pretu bistí ora ku e abitantenan tabata drumí i sorprendé nan den kamber.
Mayoria di e víktimanan tabata di edat avansá.
E akusadonan tabata eksigí nan sèn òf oro bou di menasa ku arma di kandela.
Durante tratamentu di e kaso Martinus, huntu ku 8 akusado mas a ninga e akusashonnan kompletamente. Semper el a para riba su inosensia.
Fiskal durante su rekisitorio a bisa ku no por prueba ku Martinus a kometé e aktonan i a pidi korte pa apsolvé di tur akusashon.
Martinus a hasi uso di su derechi i eksigí daño perhuisio pa e kantidat di 103 dia ku el a keda será.
Hues ta pendiente pa tuma un desishon.