WILLEMSTAD – Djaluna 6 di yüli 2026 alrededor di 00.56’or, Sentral di Polis a risibí informashon di un tiramentu ku a tuma lugá riba e kaminda ku ta kondusí pa aeropuerto, for di plenchi di tráfiko Hubert “Yubi” Kirindongo (antes rotònde di Zegu). Mesora a dirigí unidatnan polisial pa e sitio.

Djis un ratu despues a drenta yamada na Sentral di Polis ku un otro víktima di e tiramentu ta na kaminda pa Sala di Emergensia di C.M.C. Na yegada di e promé unidat na Souax, el a topa un hòmber drumí riba kaya ku diferente tiru na su kurpa i ku ya no tabata duna señal di bida. Personal di ambulans ku tambe a yega na e lugá di insidente, no por a hasi nada mas pa e víktima.

For di investigashon preliminar a sali na kla ku tabatin ponement di ‘fever’ na e sitio i pa un motibu te ainda deskonosí, un òf mas persona a kuminsá tira ku konsekuensia ku e tirunan a alkansá dos persona, di kua unu fatal. Na e sitio polis a konstatá un kantidat di mas ku 40 kashi di bala. Dòkter di polis ku tambe tabata presente, a konstatá morto di e hòmber Steven Zimmerman, nasé na Kòrsou dia 7 di novèmber 1999.