WILLEMSTAD.- Ketu bai tin plaka di papel falsu den sirkulashon. Ayera sigur dos komersiante den área di Saliña a bira víktima di un hòmber di aspekto latino ku ta kumpra kos i ta paga ku sèn falsu. Ta trata di papel di 100 florin. E papel ta fula un poko diferente, pero ta e detayenan chikí mester wak bon pa haña sa ku ta trata di plaka falsu. EXTRA por a mira i fula e diferensia entre e 100 florin real i esun falsu. E promé diferensia mas fásil pa nota ta ku e koló di oro riba e plaka falsu ta mas bibu, miéntras ku e koló di oro riba e plaka real ta ménos bibu. Na di dos lugá e kaminda ta skibí “honderd gulden” riba e plaka falsu e ta sombra na e otro banda, miéntras ku e plaka real si no por mira e sombra di “honderd gulden” skibí.

Ta rekomendabel pa komersiantenan paga bon tinu e dianan aki pasobra tin hende ta trata na pasa e plaka falsu aki. Un di e komersiantenan ku EXTRA a papia kuné ta bisa ku hopi seguridat ku ta tata di un hòmber venezolano ku a pas’é e plaka falsu. E ta kòrda e kara. A informá outoridatnan, pero probablemente debí na tantu otro tarea komersiantenan perhudiká no a haña atenshon di outoridatnan.