WILLEMSTAD.- Korte di promé instansia ayera a trata kaso di e hòmber Paul Murphy (62) di nashonalidat britániko.

Murphy ta keda akusá di tabata den poseshon di 80 kilo di koka dia 22 di sèptèmber último riba un barku di bela.

Murphy ayera a presentá den sala di korte pa tratamentu di su kaso. Hues Edelenbos a relatá ku riba e dia ei, mas o ménos mitar di 5 di mainta, Warda Kosta a mira un “go fast” kore yega na un barku di bela i despues di 10 minüt a kita bai. E barku di bela tabata nèt den e awanan teritorial di Kòrsou. E tim mes ora a sali bai riba e barku di bela i a topa e úniko tripulante na bordo ku a resultá di tabata Murphy ku alabes tambe ta doño di e boto.

Durante kontrol, e tim di Warda Kosta a haña 3 bala grandi kaminda e kapitan ta para i dos otro bala grandi banda di e stul. Tur tabata  yená ku koka ku a resultá den 80 kilo den 70 pakete. E akusado na promé instante a deklará na polis ku e palabrashon tabata pa e tuma 50 kilo di mariwana i no koka. Pero ayera durante tratamentu di e kaso, el a bira wak su abogado mr Prevo i a bis’é ku e ke papia. El a bisa hues ku e ke ta honesto p’esei e ta atmití ku e tabata sa ku e kargamentu tabata konsistí di koka. El a  splika ku su intenshon nunka tabata pa bin Kòrsou. E no konosé Kòrsou i no tin kontakto na Kòrsou. El a nabegá for di Antigua i mester a bai topa e “go fast” banda kosta di Venezuela. Despues e lo mester a bai Antigua bèk, warda e temporada di orkan pasa, pa e nabegá bai Inglatera pa hiba e droga.

El a splika ku di un òf otro manera e bientu i koriente di laman, a hib’é nèt den awanan teritorial di Kòrsou.

Segun e akusado mas aleu, e ta poko rabiá, pa motibu ku el a akordá ku e hendenan  pa tuma solamente 50 kilo di koka pero nan a trese 80. Hues Edelenbos a bis’é ku no tin diferensia entre e 50 kilo òf 80 den e kaso aki. Echo ta ku el a tuma un kantidat di droga riba laman.

El a ninga di bisa ken ta pará tras di e 80 kilo di koka. E akusado a bisa ku e tin miedu di represaya i ta preferá di no divulgá  nòmber. El a splika ku el a topa e hòmber 3 aña pasá. E hòmber a invitá e ku su famia pa bin pasa fakansi serka nan i di ei e amistat a  krese. Den un di e kòmbersashonnan ei nan a yega na e akuerdo pa trafiká droga. Murphy a splika hues ku e ku su famia tabata den un situashon finansiero malísimo. Su kasá ta lam di un banda i no por traha. E lo a haña 55 mil pound pa e transporte. Dor di desesperashon el  akseptá e oferta, pero awor el a realisá ku el a kometé un estupides ku su bida.

Fiskal a haña e akusashon probá a base di e paketenan di droga  ku Warda Kosta a haña i tambe e deklarashon di e akusado mes.

Mirando tur esakinan el a yega na e demanda di 42 luna kitando aresto preventivo. Hues den su desishon a bai kompletamente di akuerdo ku e demanda di fiskal.