WILLEMSTAD.- Hòmber ta keda detené pa intento di asesinato riba agente polisial.

Djasabra 11 di febrüari 2017 alrededor di 04.35 ‘or di mardugá, un unidat polisial ku tabata desviá tráfiko na e krusada Schottegatweg Noord ku Suffisantweg en konekshon ku un aksidente ku herido, a duna shofùr di un vehíkulo òrdu pa e lora na man drechi.

E shofùr aki a neglishá e òrdu, oumentá su velosidat i sigui su kaminda riba Schottegatweg Noord.

E polis ku tabata desviá e tráfiko mester a bula na banda pa no keda alkansá pa e vehíkulo aki. Mes ora e otro polisnan ku tabata na e sitio a intervení, i a logra pa e shofùr para e vehíkulo.

E hòmber shofùr G. v/d M. nasé na Ulanda di 28 aña di edat, a keda detené pa intento di asesinato. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.