WILLEMSTAD. - Ayera 24 di mart den kareda di algu promé ku 2 or di mèrdia e tim investigativo di kasonan di homisidio, huntu ku ‘response team’, a detené e hòmber di inisial I.W. nasé na Kòrsou di 45 aña di edat, relashoná ku e kaso di asesinato ku a tuma lugá djabièrnè tras di lomba dia 19 di mart na Berg Altena.

Djabièrnè tras di lomba nèt algu despues ku toke de keda a drenta na vigor, un patruya di polis ku tabata patruyando den Batavierwijk a tende zonido di bala. Polis a bai den e direkshon i a mira un vehíkulo krusa nan dilanti i drenta den Bergweg. Polis ta sigui e outo i a topa ku un hòmber drumi abou kantu di un outo ku ainda su porta tabata habrí.

E víktima tabatin diferente impakto di bala parti ariba di su kurpa.

E víktima a resultá di ta Nichael M.A. Richards nasé Kòrsou di 22 aña di edat.

Tabatin algun aspekto ku a hala atenshon di polisnan i nan a tuma tur na konsiderashon pa ku e investigashon ku a kontinuá. Ayera polisnan a drenta den Arraratwijk i a detené un hòmber di 45 aña di edat, sospechá di tin di aber ku e asesinato. Despues di e aresto polis a tene dos entrada hudisial na Arraratwijk kaminda a haña i konfiská algun mata di mariwana.

A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.