PHILIPSBURG.- Un  hòmber  di 48 aña di edat  a keda demandá na  6 luna di prizòn, pa motibu ku el a tene relashon seksual ku un kriatura di 13 aña. E mucha a sali na estado i duna lus na un yu hòmber. Dia 26 di aprel korte lo diktá sentensia den e kaso aki. E hòmber a   konos’é e damsita na luna di mart i tabatin relashon seksual kuné durante nan promé enkuentro. E damita tabata bou di supervishon di korte di tutela, mirando ku e tabata den lucha kontra alkohòl i droga.  E akusado a konta un historia basta largu. El a bisa ku e ta esun ku a yuda e damita i ku awor e ta na un lugá kaminda no tin droga ni alkohòl.

Hues a kòrda e akusado ku e no ta su dilanti pa a yuda e damsita sino pa tene relashon seksual ku un menor di edat. E hòmber a bisa ku e damsita na promé instante a bis’e ku e tin 17 aña. Hues a bis’e si e ta plania pa kasa kuné paso aworakí e ta mama di un di e tantísimo yunan ku e akusado tin  den diferente pais. E akusado a bisa  ku el lo sigui ku e damsita si e ta deseá. Riba esaki fiskal a remarká, pa motibu ku e damita no a kumpli 16 aña ainda.  Korte di menor a pone Ministerio Públiko na altura di e situashon, despues ku nan a haña sa ku e tin un relashon ku un hòmber muchu mas grandi kuné.

E damsita na promé instansia no kier a duna niun klase di deklarashon, segun fiskal.  El a atmití ku el a gaña e hòmber ku ta 17 aña e tin. Ta un par di dia despues mama di e damsita a bis’e ku ta 13 aña e tin. E damsita a bisa ku el a hasi sex

boluntariamente ku e hòmber. E damita no kier a bai skol mas, pa motibu ku e tabatin hopi bèrgwensa ku su barika.

Hues a bisa e akusado ku korte superior a bisa ku un adulto ta obligá pa buska informashon di edat di un hóben, promé ku e drenta un relashon seksual kuné. Aunke ku e damita a ninga, tabata obligashon di e akusado pa buska pa sa su edat tòg. Segun e informashon, ku e hòmber i e damsita tabata biba manera hòmber ku muhé di otro. E tribunal di menor a bisa ku si duna e hòmber kastigu kondishonal, esaki ta bai kontra tur lei. Segun e tribunal, e akusado no ta konsiente di e gravedat di e kaso. Abogado di e akusado Geert Hatzmann, a keda sorprendí ku e demanda.  El a indiká ku e damsita ke pa e hòmber regresá kas mas pronto posibel. Segun e abogado e mucha muhé  di apénas di 13 aña, a yega di tene relashon seksual ku hòmbernan adulto anteriormente. E  damita a bisa di no ta sinti su mes víktima. E abogado a bisa ku su kliente a kometé un fayo, pero tin un influensia positivo riba e damsita. Segun e abogado, e obligashon pa investigá edat  no ta algu realístiko. El a bisa di a wak un potrèt di e dama di kual e no ta aparentá di tin 13 aña.

Hatzmann a puntra ki ta e ophetividat di fiskal ku e kaso? Pa e damsita deshasí di uzo di droga i alkohòl, e famia awor mester separá for di otro? Segun e abogado ken nan ta pa bisa e damsita ku loke el a hasi ta robes, òf bisa e yu si e ta un produkto di un krímen. Hatzman a pidi tribunal pa deklará e kaso no atmisibel i apsolvé su kliente. Segun e abogado e pareha ta bibando manera esposo i esposa i nan ta hopi felis.