WILLEMSTAD.- Un hòmber di 70 aña   a keda gará na Hato ora el a trata na eksportá  3904 gram di koka pa tera friu. E tabatin un total di 5 pakete di plak na su kurpa.  Ta trata di akusado J. Zijlstra. Segun e prosèsverbal, a deskubrí e paketenan na lomba, tur dos rudia i tambe na  batatanan di pia di e akusado. E droga a keda deskubrí ora ku e akusado di edat avansá a pasa dor di e mashin ku ta detektá metal. E mashin a aktivá di kual a pone ku duana  a bai listra e sospechoso. Zijlstra a atmití su echo. El a deklará na polis ku el a topa un tal Purcey na Maduru Dam na Ulanda i a ofresé e trabou.   El a bai di akuerdo i lo a haña 5 mil euro si tur kos a kana bon. Zijlstra mester a bula bin Kòrsou, pa aki e tuma e merkansia i bula bai bèk Ulanda.  Segun Zijlstra, ora el a yega Kòrsou, Purcey mes a bin busk’é for di Hato i  sòru pa su estadia i a dun’é sèn pa e kome. Ora e yega Ulanda un primu di Purcey lo mester a bai busk’é na Schiphol. El a duna algun detaye di e Purcey entre otro ku e ta un hòmber ku ta hisa peso i ta un yu di Kòrsou. Zijlstra a deklará  na polis ku el a keda basta desapuntá pa motibu ku  Purcey a bis’é ku ta 2 kilo i ora el a keda gará el a haña tende ku ta kasi 4 kilo e tabatin.  Hues a remarká ku na aña 2003 i 2008 Zijlstra a keda kondená pa lei di opio na kastigunan basta haltu.  Fiskal ta haña e akusashon legalmente i konvinsentemente probá i ta demandá e akusado na 24 luna kompletamente inkondishonal. Abogado di Zijlstra den su defensa a pidi hues pa tene kuenta ku e edat di su kliente i tambe su situashon. Hues Paulides den su veredikto a duna di konos’é ku e no ta mira niun motibu pa tene kuenta ku e akusado su edat mirando ku den pasado el a yega di keda kondená pa mesun delito. Hues ta bai kompletamente di akuerdo ku e demanda di  fiskal.