WILLMESTAD -  Awe mèrdia tempran un hòmber bou di su awa a kousa un káos total den tráfiko den área di Maripampun na momentu ku el a dal den vários outo. E situashon mas lamentabel ta ku e persona aki bou di influensia di alkohòl a keda bon miéntras ku un hòmber inosente a risibí herida nan i mester a keda transportá pa hospital ku ambulans. Tur e káos a kuminsá na e krusada di Rotterdamweg i Martin Luther King Blvd kaminda e outo, un Mitsubishi Lancer pretu ku man kontrali, manehá pa e hòmber fuma a dal den un outo na altura di pòmp di gasolin i a sigui kore bai. Den su atento pa hui for di e sitio a bai dal den un otro outo ku a bai dal kontra di un tuk tuk. Ainda no tabata basta ya ku el a bolbe purba kore bai i dal den un otro outo ku na momentu ku a para un trùk di Aqualectra a bin kore dal su tras. Polis mesora a detené e shofùr fuma na e sitio i mester bai duna kuenta i rason di su aktonan.