WILLEMSTAD. - E hòmber F. Iltes (62) a presentá dilanti hues akusá di a benta gasolin riba dos hende muhé ku e intenshon pa sende nan na kandela.
Segun e akusashon dia 13 di òktober 2018 Iltes tabata bastante furioso ora el a basha gasolin riba ámbos persona, miéntras el a trata pa sende nan na kandela. Iltes a bisa hues ku aunke e tabatin e lusafè den su man, ningun momento so e no kier a sende e personanan aki na kandela, sino únikamente e kier a spanta nan.
Hues a mustra Iltes ku un komportashon di tal índole ta kompletamente robes i sigur pa e echo ku el a bini ku lusafè nan tras, ta un muestra ku su intenshon no tabata niun tiki bon.
Segun testigunan, un di e damanan ku a hera di bira víktima a sali mesora na kareda.
Hues a relatá ku tabata despues ku e personanan aki a sali un fiesta, Iltes tabata hopi rabiá, ku el a pasa man kue un ‘Jerrycan’ ku gasolin, zuai e líkido riba e personanan aki, inkluso su kasá gritando: “Awe mi ta mata bosonan tur”.
Riba e pregunta na Iltes unda el a haña e gasolin, el a bisa ku e ta un drechadó di boto i p’esei semper tin tur e loke nan ta nesesario huntu kuné.
Hues a bisa ku e ta konsiderá e echo aki komo un maltrato mirando ku e líkido tin impakto di soya kurpa. Segun un otro testigu, Iltes a purba sende e lusafè, pero no a logra. Iltes sa ninga esaki drástikamente. El a bisa ku e kier a djis spanta e muhénan aki.
Segun deklarashon di un di e víktimanan, e akusado pa basta tempu kaba tabatin problema ku e duo i nan ya no tabata sali asina bon ku otro mas.
Fiskal mr. Janssen a elaborá ampliamente riba e suseso i a bisa ku gasolin ta un líkido sumamente peligroso banda di kandela i ta p’esei en prinsipio e akusashon ta intento di asesinato kontra di Iltes.
Aparentemente ningun momento so, e dama no a bisa di a mira Iltes ku lusafè den man.
Tin un testigu parse ku tambe a mira e suseso, a tira piedra i dal e akusado den kabes, pa evitá ku Iltes lo a sigui ku su intenshon.
Fiskal a bisa ku ta trata di un kaso basta kompliká i pa tipo di kasonan manera esaki tin un kastigu mará entre 12 pa 24 luna di prizòn. Finalmente fiskal a hasi demanda di 240 ora di trabou, mas un kastigu di prizòn di 1 aña kondishonal i 3 aña di prueba i guia di Reclassering.
Hues den su desishon a bai di akuerdo ku fiskal i a kondená e akusado na 1 aña kastigu di prizòn kondishonal ku un periodo di prueba di 3 aña i un kastigu di trabou di 200 ora i si e no kumpli ku e kastigu di trabou e mester bai 100 dia será mas guia di Reclassering.