WILLEMSTAD.- Ayera   nochi den e bario di Rancho un hòmber a keda gravemente heridá. Algu promé ku 12’or di ayera nochi, sentral di polis a keda dirigí pa e bario di Rancho, kaminda tabatin un hòmber drumí abou riba kaminda. E tabatin perforashon di bala na altura di su skouder. Dos ambulans a presentá na e sitio, i despues a transportá e víktima pa departamento di emergensia na Poli. E hòmber su situashon ta di gravedat.

:

Djabièrnè 25 di mei 2018, alrededor di 23.44 or di anochi, Sentral di Polis a risibí
notifikashon di un kaso di tiramentu ku a tuma lugá den área di Rancho.
Na e sitio polis a haña un hòmber heridá drumi riba kaya den un plas di sanger. Te kaminda
esaki tabata posibel i bou di e sirkunstansianan presente, por a mira ku e víktima tabatin
herida di bala na e parti ariba di su kurpa. For di un investigashon preliminar ku polis a
realisá na e sitio a resultá ku un ratu promé habitantenan di den e área a tende zonido
probablemente for di un arma di kandela. Ambulans ku a presentá na e sitio a transportá e
víktima den situashon krítiko pa poliklínika di SEHOS pa tratamentu médiko. Alrededor di
01.10 or dokter na SEHOS a konstatá morto di e víktima. E prosedura ku ta mantené na dje
ta, ku ta notifiká famia via e kanal(nan) legal i ofishal promé i despues di esei por publiká
identidat di e víktima. Na e sitio polis a haña i konfiská hulsnan ku tabata riba kaya. Riba
òrdu di Fiskal di Ministerio Públiko a konfiská e kurpa sin bida pa mas investigashon.
Motibu di e tiroteo aki te na e momentunan aki ta deskonosi i den investigashon.