WILLEMSTAD.- Kaso di e akusado Sergio Francillon (46) nasé na Haiti akusá di ta involukrá den e kimamentu di e edifisio di impuesto, a keda tratá ayera integralmente.

Francillon ta keda akusá di a duna òrdu i òf a sende e edifisio di impuesto na kandela dia 22 di ougùstùs 2019, poniendo bida di e pèrsonal di seguridat na peliger i tambe dokumentonan di rònt Kòrsou i kousando un daño finansiero enorme.

Huntu kuné e hòmber venezolano Ramirez Medina ta keda akusá di ta un di esnan ku a yuda sende e edifisio na kandela.

Oktober Medina a keda kondená na 4 aña despues ku Ministerio Públiko a dun’é mitar kastigu pa su koperashon.

Medina a duna deklarashonnan inkriminatorio i koperá ku hustisia. P’esei e ta será na Boneiru pa su seguridat.

El a bisa di tin hopi miedu di Francillon i p’esei e no ke bin Kòrsou.  Segun Medina Francillon i su primu Nesly  ta esnan ku a duna  òrdu pa kima e edifisio kontra pago di 7 mil florin pa kada un. Francillon despues a distansiá su mes fo’i e pago. Nesly ta esun ku a  paga nan e sèn.

Francillon ta keda akusá tambe di a laba mas di 5.2 mion florin, ladronisia di awa i koriente na su kasnan i inkubrimentu di un mashin di trel plat hòrta.

Fiskal Lepel i Jansen a bisa ku e daño hasí na e edifisio di impuesto ta entre 43 pa 45 mion florin.

Segun Ministerio Públiko hustisia ta en buska di 3 sospechoso mas den e kaso aki, entre nan un amigu òf famia di e akusado Nesly Francillon ku tambe ta keda akusá di a duna òrdu pa sende e lugá.

Nesly despues lo a hui bai Haiti.

Ministerio Públiko ta bisa ku tin dos motibu ku e akusado por a laga sende e lugá na kandela. Segun fiskal Francillon ta doño di un kontratista na Isla i debe belasting sumanan mionario. Hopi bia belasting tabatin sita kuné pa drenta akuerdo. Nan tabatin hopi problema pa ku su pago. Tantu e komo su primu Nesly.

Ultimo e tabata debe mas di 60 mil florin i te ku awor a paga 35 mil florin. Pero segun deklarashon di e ko akusadonan venezolano, e motibu ku nan kier a sende e edifisio na kandela ta pa Francillon i su primu Nesly haña e trabou, pa konstruí e edifisio di nobo. Nan tabatin kontakto ku por a regla, pa nan ta e úniko kontratista ku por a bin na remarke pa konstruí e edifisio di nobo.

Segun fiskal e dia mainta ei, Francillon tabatin hopi kontakto ku Nesly via telefòn, mas ku 16 bia.

E di tres sospechoso ta un amigu di Javier Medina ku yama Leo ku a logra hui bai Venezuela, pero awor ta keda buská pa hustisia di Kòrsou.

Tambe tin un otro venezolano ku tabata kómplise di e kandela, di fam Rosas, ku ta sera awor aki na Venezuela.

Fiskal a bisa ku tin un petishon pa buska Nesly Francillon na Haiti via Interpol internashonal, pa skuch’e i traslad’é pa Kòrsou.

Francillon  a para riba ku e ta inosente i no tin nada di aber ku e akusashonnan. Ayera el a bisa hamas i nunka e por a hasi algu asin’ei.

Semper di su bida el a traha duru i paga impuesto.

Hues Snitker ku a hasi e kaso ayera i a pasa den e dosié i a bisa ku Francillon tabatin diferente kòmbersashon na impuesto pa kuminsá paga.

Despues di e suseso dia 18 di sèptèmber 2019, polis a tap kòmbersashon di e akusado kaminda nan a tende ta papia ku Nesly.

A tende nan papia tokante di e hendenan ku no a bai dilanti hues ainda i ku mester hasi algu pa nan no papia.

Nesly ta bisa Francillon si e papia bosnan ta den problema. “Nos tin nòmber di e mener pa hasi algu, pa e no papia. Mi mester di e adrès”.

‘E no tei el a bai Boneiru’.

Ayera e akusado ta bisa ku e no ta kòrda e kòmbersashonnan ei.

Mas aleu hues a sigui bisa ku e detenido di fam Castillo ku tabata será ku Francillon a deklará na polis, ku Francillon a kont’e ku el a paga e venezolano pa kima e lugá di impuesto. Segun e akusado e nunka a papia ku Castillo te pe bis’é e kosnan ei.