WILLEMSTAD – Un aksidente di tráfiko bastante pekuliar a tuma lugá den oranan di mardugá na Schottegatweg, na altura di Rio Frio, kaminda un hòmber ku tabata kondusiendo un Suzuki SX4 kòrá a bòltu ku su vehíkulo.

E outo a keda riba su banda, serka di edifisio di Rio Frio unda durante dia hende ta sinra trankil pa kome. Riba kaya por a mira diferente pida di material plamá komo konsekuensia di e aksidente.

E shofùr a resultá heridá durante e aksidente. Personal di ambulans a atend'é na e sitio i a transporte pa CMC pa sigui ku atenshon médiko. Polis tambe a presentá na e sitio i a sera e área ku sinta polisial.

Te na e momento aki no ta konosí eksaktamente kon e shofùr a pèrdè kontròl di su vehíkulo ni e grado di herida ku el a sufri. Polis ta investigando e sirkunstansianan di e aksidente.