WILLEMSTAD.- Tata di un baby ku a kaba di nanse, a trata na eksportá un kantidat di 420 gram di koka, pa bai wak su yu na Hulanda.
Segun e akusashon, e hòmber tabatin e droga den su ekipahe di lomba.
Riba e dia en kuestion ora el a yega Hato, e pèrsonal di duana a tuma nota ku tabatin algu straño ku e ekipahe. E tabata saka un holó poko fuerte i por a mira ku e rantnan tabata basta di kònkel. Esei a pone ku e tim a bai kontrolá e tas poko mas profundo. Nan a bora e rantnan di e ekipahe i a haña e droga den e rantnan skondí den un saku di plèstik.
E akusado a atmití ku e kier a transportá droga, pa e haña chèns di bai wak su yu, ku a kaba di nanse na Hulanda. El a splika ku el a pèrdè trabou fo’i komienso di e pandemia di COVID-19 i lógikamente no tabatin entrada.
El a haña un oferta pa e pasa e droga pa algun persona ku e lo no bai divulgá nan nòmber i a bai di akuerdo. Mama di e yu a bai Hulanda fo’i promé i e mester a bai despues, pero no por a logra keda kla ku sèn.
Segun e akusado, su intenshon tabata pa bai serka su yu i tambe kumpra algun kos pe.
Fiskal a haña e akusashon probá, pero a tene kuenta ku e akusado a atmití su kulpa i tabata habrí ku hustisia. Mirando tur esakinan, fiskal a hasi demanda di 6 luna kondishonal pa e akusado ku un periodo di prueba di 3 aña. Hues den su desishon a honra e demanda di fiskal.