WILLEMSTAD.- E akusado Shadrach Dap kondená na 12 aña di prizòn pa asesinato di Roberto Jose Cathalina, (Colombia 1982) a apelá su sentensia. Shadrach semper a para riba, ku el a aktua den defensa propio. Segun e akusashon, Shadrach a hinka e víktima na altura di su garganta ku konsekuensia fatal.
E kaso a tuma lugá 4 di sèptèmber 2019, na krusada Mampurituweg/ Kaya Juan A. Lesire. Shadrach despues di su akto, a drenta su outo bai, pero siguiente dia a bai entregá su mes na polis.
Polis no a haña arma den outo i nada ku e víktima por a uza komo arma kontra e akusado, manera e ta pretendé.
Shadrach a konta ku e dia ei e tabata pará den lus di tráfiko, ora el a mira Roberto pasa. E hòmber a wak’é i bira bin su tras dirèkt. Segun e akusado, Roberto a kore dal den su outo vários bia.
Despues Roberto a kore bin mas duru dal den su bùmper patras, kaba blòki’e. Ei a surgi un konfrontashon den nan i el mira kon Roberto a kuminsá buska algu den su outo.
El a spanta i sintá den su outo, el a kue Roberto choka. Roberto miéntras tantu a hasi manera e ta kue algu abou i ora el a tuma nota di esei, el a hink’e den su lomba, paso e no tabata sa kiko Roberto tabata bai kue. Despues Roberto a logra lòs i sali di otro banda di porta di pasahero. Ora ku Roberto a baha, e tabatin un palu den su man, ku el a kue patras den e outo.
Shadrach a bisa, ku e na su turno a subi e dak di e vehíkulo i purba tene e palu ora Roberto tabata zuai e riba dje. Despues el a mira ku Roberto tabata tur na sanger i el a drenta su outo i kore bai.
Segun testigu, nan a mira Shadrach hinka mitar kurpa den outo di e víktima e dia ei. Despues ámbos a baha fo’i outo i a kuminsá bringa. Shadrach a kue un palu i zuai e den e direkshon di e víktima.
Hues a duna di konosé ku polisnan a skibi den e prosèsverbal, ku no tabatin sanger den outo di e víktima, p’esei nan ta kere, ku e akusado a hinká e víktima na momento ku el a baha fo’i outo. Tampoko a haña arma den outo di e víktima. Dòkter a konstatá ku e víktima tabatin vários repchi kibrá. E akusado a bisa ku e tin hopi duele pa loke el a hasi i e manera kon e kosnan a bai, pero no tabata su intenshon pa mat’e.
Fiskal den korte di promé instansia no a haña ku tabatin aktuashon di defensa propio den e kaso aki i ta di opinion ku e akusado a bai demasiado leu.
Hues den su desishon, a tene kuenta ku e akusado despues di su akto, no a para wak si e víktima tabatin mester di yudansa. El a drenta su outo i kore bai lag’e atras bentá riba kaya. Apesar di tur esakinan, e akusado ta insistí ku el a defendé su kurpa i ta haña ku e mester bai den libertat inmediatamente.