WILLEMSTAD.- Kaso di e akusado Rolangelo Eranio lo keda presentá den Hof djaweps próksimo.
Eranio a keda kondená na 4 aña di e sistema di TBS ku e chèns pa e por sinta mas si ta nesesario na Hulanda. Despues di 3 aña ainda Eranio ta den Foba sin por yega Hulanda.
Eranio ta keda akusá di a sende Raymond “Raymi” Casimiri na kandela intenshonalmente, despues ku el a dal e ku un líkido flamabel dia 3 di yüni 2017 na e toko chines den Zuiderzeestraat Suffisant.
Korte di promé instansia dia 12 di aprel 2018 a trata e kaso di sendementu di kandela ku e konsekuensia fatal.
Eranio a keda akusá tambe di a kousa daño ku e kandela na dos menor yu di e komersiante chines, ku tabata para den serkania.
Ministerio Públiko ta akus’é tambe di a hasi daño na algun artíkulo den e tienda.
E víktima Casimiri a sufri kemaduranan serio ku a pone ku e heridanan a kue infekshon i a fayesé despues di 7 siman na un klínika na Colombia.
E akusado ku ta sufri di un malesa mental króniko segun rapòrt sikológiko, a atmití su kulpa.
El a bisa ku el a kometé e akto aki pa motibu ku e tabata hopi fadá ku e víktima su aktonan i tambe su amigunan.
Djaweps e akusado mester presentá dilanti 3 hues, segun e prosedura, pa wak kon ta para ku e traslado pa Hulanda.

https://extra.cw/piroman-ta-sende-homber-na-kandela-pa-motibu-ku-el-a-tira-piedra-riba-su-dak-di-kas/