“E ta pertenesé na un gang di ladron i a pone 10 mil florin riba mi kabes den prizòn”

WILLEMSTAD.- Korte di promé instansia ayera a trata un kaso di intento di asesinato i poseshon di arma kandela.

Ta trata di  e hòmber Ulrich Toppenberg (50) ku mester a presentá den sala pa responsabilisá su mes pa su akto.

Toppenberg ta keda akusá ku dia 16 di febrüari último, el a basha bala intenshonalmente riba pikòp  di un músiko di inisial L.E.

Ayera Toppenberg a bisa ku e ta atmití di a tira riba e pikòp.

El a splika ku L.E. tin hopi ratu ta molesti’é. Segun Toppenberg, L.E. ta lider di un “gang” di ladron ku ta práktika hopi ladronisia.

Segun Toppenberg na 2013, L.E. i su gang a hòrt’e  un motor. E tabata traha na Janthiel ora ku e grupo a presentá ku un pikòp koló kòrá di un piskadó, pasa su tras i bai ke motor. El a bisa ku un turista hulandes a para mira tur kos.

Segun e akusado, for di e tempu ei, e hòmbernan tabata pasa keda wak den su kas. Nan tabata menas’é i a tira riba Santa Rosaweg  banda su kas.

El a bisa ku e grupo ku ta konsistí di hòmber i muhé, tur ta kana pasa dilanti su kas.

E akusado a konta ku un biaha e tabata na chino, el a   saka potrèt di E.  ku a bis’é ku e sigui  e ta kue e otro bròmer tambe.

Segun e akusado, e grupo ta mustra bu, ku nan a hòrta bo kosnan i mustra bu tambe ku nan tin bo propiedatnan despues ku nan kaba di hòrta nan.

Segun e akusado riba e dia di e insidente, e tabata sintá na  chino i tabata poko bebé. El a warda e víktima pasa i a lòs e balanan den banda di su pikòp pa spant’é. El a bisa ku niun ora so e intenshon tabata pa mat’é.

El a splika ku L.E. tabatin e hopi kansa. Segun e akusado,  el a laga nan hòrta  “front” di su  “Vitz” pa despues laga algun mucha kore saka dede pe den su  kámara di seguridat.

El a konta ku 6 luna pasá el a  kumpra e arma pa defendé su mes, mirando kon peligroso Kòrsou a bira. E sa ku el a kometé un fayo i ta aseptá esei.

Segun e akusado, el a tira e arma afó, pasó bo no sa nunka su istoria.

El a bisa ku 3 dia despues el a  papia ku L.E. ku a bèl su subrino pa bis’é legumai e kos ei.

Segun Toppenberg,  el a tende ku aworakí tin 10 mil florin pone riba su kabes den prizòn. Venezolanonan ku tabata bon kuné den blòk, a bira kontra dje pa nan kobra e sèn.

Fiskal ta haña e akusashon legalmente probá,  mirando e kantidat di bala ku e akusado a lòs dirigí riba e pikòp. Segun fiskal e akusado a hasi esaki di dia kla i kaminda vários hende ta kana pasa.

Mirando tur esakinan fiskal a yega na un demanda di 5 aña i mei di prizòn.

Hues den su desishon a haña e akusashon proba  pero a baha e kastigu na 5 aña di prizòn kitando aresto preventivo.

E víktima a pidi daño perhuisio di 40 mil florin  pero korte a bai di akuerdo ku 38 mil florin.