WILLEMSTAD.-  Korte ku ta trata delitonan kastigabel den tráfiko, ayera a trata kaso di un aksidente ku a tuma ku un siklista. Pa ku esaki e akusado R.M. mester a presentá dilanti hues huntu ku su abogado señora Bakhuis pa asumí su responsabilidat.

E ta keda akusá di a aksidentá  basta fuerte kontra un siklista na luna di yüni 2019.

Esaki a sosodé  6 or di mainta riba Winston Churchillweg, pasando e negoshi di pan Libanesa rumbo Santa Maria.

Tantu hues Edelenbosch i fiskal Niks no por a konkluí den ki situashon presis e akusado tabata na momento di e aksidente.

No a hasi tèst pa saka afó si e akusado tabatin alkohòl den su sistema, riba e dia di e aksidente.

Segun deklarashonnan di e shofùr, e dia ei su kurpa tabata kansá, pasobra e tabatin 26 ora sin drumi.

Korte a bisa ku por tin vários senario. Sea el a bebe alkohòl i tabata klaramente bou di influensia, pero no ke atmití, òf e tabata kansá bèrdat dor di a pèrdè muchu soño i a kousa e aksidente.

E aksidente a tuma lugá di un forma remarkabel, mirando ku e vehíkulo ku e shofùr tabata manehá a kita for di kaminda bai dal e siklista, ku a haña slanan na garganta i pèrdè djente.

Banda di esaki, e mester a bai dòkter di wowo i sigui terapia pa su kurpa por rekuperá.

Ministerio Públiko a laga pasa e imágennan i klaramente por a mira riba e vidio ku a pasa den sala di korte kon grave e aksidente tabata, kaminda ku por a tuma nota kon e víktima a  bai laira dor di e impakto.

Fiskal mr. Niks a tuma e akusado hopi na malu pa motibu ku un siman despues di e aksidente, el a bolbe kuminsá kore outo sin buska ayudo profeshonal pa stipulá kiko por a pas'é ku el a hañ’é den e aksidente.

Fiskal Niks a demandá e akusado na 180 ora kastigu di trabou, prohibishon di kore outo 18 luna di kual 12 kondishonal i komo emergensia e mester bishitá un médiko pa analis’é si tin algu robes kuné.

Hues Edelenbos den su desishon a imponé pa e akusado na un kastigu di 150 ora di trabou, mas 6 luna kondishonal sin pèrmit pa kore mará na un periodo di prueba di 2 aña.