WILLEMSTAD.-Kobamentu di mama i faltamentu di rèspèt na outoridatnan, ta algu ku sigur no ta wòrdu tolerá pa hustisia i ta kastigabel pa lei.

Esaki tabata e kaso dia 8 di febrüari último durante marcha di karnaval,  ora ku e akusado R. Adelina (29) a falta mama di e agentenan polisial durante akshonnan “Aktua robes sintié un bes” i tambe “Ta basta awor”. Ta trata di e akshonnan ku Ministerio Públiko i tambe Kuerpo polisial Kòrsou a bin kuné.

Mesora e akusado a keda detené i hibá warda di polis. El a deklará ku el a bebe asina tantu alkohòl i tabata bastante fuma.

Segun e akusado, e no por kòrda ku el a koba mama di e agentenan.

Ayera durante tratamentu di su kaso, e akusado mes no a presentá  pa responsabilisá su mes pa su akto.

Fiskal a haña e akusashon probá i a bisa ku e akusado a keda di dagfar i mester a paga un suma di f400,- promé ku 28 di mart.

Debí ku e no a kumpli ku esaki, aworakí e suma a bira fl480,- òf 9 dia será.

Na promé instansia hues a bisa ku e prosèsverbal ta skibí na ulandes  “loop naar je moeder”.

Hues a bisa ku den prinsipio e no a mira nada robes na esaki.

Despues ku fiskal a splik’é kiko presisamente e palabra ta nifiká, hues a haña esaki un falta di rèspèt kompletamente pa outoridatnan.

Hues Edelenbos den su desishon, a bisa ku esaki no ta akseptabel, pa motibu ku mester respetá kuerpo polisial.

Mirando esaki hues ta bai kompletamente di akuerdo ku e demanda di fiskal.