WILLEMSTAD.- E akusado Juan Antonio Norton (40) nasé na República Dominicana ayera a keda kondená na 180 dia di kual 117 kondishonal mas 3 aña di prueba.

Norton ta keda akusá di a menasá promé minister di Kòrsou Eugene Rhuggenaath ku morto dia 11 di ougùstùs último riba Facebook, kaminda e ta bis’é “mi ta bisa bu, si bo sera mi, unda ku mi haña bu, lo mi bula bo kas i tira bu mata”.

Dia 12 di ougùstùs Norton a keda detené i dia 14 di òktober el a keda poné den libertat, pendiente tratamentu di su kaso.

E akusado ayera a presentá den sala pa responsabilisá su mes pa su akto. El a bisa ku defakto e no ke papia mas di e kaso pa motibu ku e ta haña ku el a sinta sufisiente den prizòn pa loke el a hasi.

Hues Edelenbos na su turno a puntra e akusado, pa pone su mes den sapatu di promé minister i kon e lo a sintié, si tabatin un hende ku a subi Facebook i menas’é di tal forma.

Norton a splika ku e tin algu ku yama “Mors Code”. Ta trata di un inspirashon ku ta bini di ariba ku Dios a manda pe. Segun Norton e ta un Skritura kaminda bo ta haña  “Lord”, Jezus i e mes. El a bisa ku hendenan no a komprondé e dia ei kiko e kier a bisa. Segun e akusado  e mester a bisa promé minister via su “Mors Code” ku e hendenan no ta di akuerdo ku e 12% ku gobièrnu kier a bin kuné. E kier a atvertié tokante di esaki.

El a bisa tambe ku el a haña den su “Mors Code“ ku Ruggentaath ta un  “Hollandse homo”, pasó e ta wòrdu dirigí pa gobièrnu hulandes. El a sigui bisa ku tur loke el a bisa na Rhuggenaath el a hañ’é via e mensahe di “Mors Code”.

Segun e akusado, na Hulanda el a sinta den un klínika pa personanan ku problema sikiátriko, despues ku el a haña su promé atake di “Mors code”.

E profeshonalnan hulandes a traha un rapòrt, kaminda nan ta indiká ku e ta sufri di Skisofrenia. Mas aleu  nan a splika ku e akusado no ta biba den realidat i ta papia di kosnan ku no ta eksistí. Segun e rapòrt sikiátriko, Norton tin ku haña un bon guia di Reclassering.

Fiskal a haña ku e sorto di menasanan aki ta inspirá otro hende pa hasié.

Fiskal a tene kuenta ku e ta ménos responsabel pa su aktonan. Mirando ku el a sinta 60 dia kaba i no ta mira e motibu pa e bolbe bai será, fiskal a yega na 6 luna kondishonal  kual 4 kondishonal ku un periodo di prueba di 3 aña .

Hues den su desishon a bisa ku e ta respetá e akusado su pensamentu i manera di pensa, pero e mensahenan ku e ta trese no ta bon i e lo por sigui haña problema. Hues a desviá for di e demanda i a konden’é na 180 dia kual 117 kondishonal.

Fiskal a rekomend’é pa bai sikiater si mester i tambe bebe remedi, huntu ku guia di Reclassering.

LAGA UN KOMENTARIO

Please enter your comment!
Please enter your name here