WILLEMSTAD.- E akusado R. Hart (56) a presentá den sala di korte akusá pa menasa ku morto i maltrato severo.
Segun e akusashon, e akusado a menasá mama di su yu ku ta un dama chines ku e lo mat’é. Esaki a sosodé den e periodo di 7 desèmber 2020 te ku 25 febrüari 2021.
Hart a bisa ku e dia ei e no a menasá niun hende.
El a splika ku e dama a kuminsá grit’é i e tambe a grit’ébèk pasó e no ta mucha chikí.
Segun e akusado úniko kos ku e tabata ke ta wak su yu.
Pero kada bes ku e bai na e kas, ta surgi problema.
E dama a konta ku e akusado kada bes ta bin fuma na su kas pa wak nan yu.
E hòmber no ta traha i a kibra vários outo di dje ora e ta fuma.
Segun e dama, si e hòmber lanta buska trabou, e por yud’e ku sobra kosnan pero e hòmber no ke bai traha i ta bin buska problema na su kas i menas’é ku morto.
Fiskal a haña e akusashon di menasa komprobá despues ku e señora a hasi denunsia na polis.
E akusado a bai su kas i menasá mama di su yu. Mirando esakinan fiskal ta demandá e akusado na 30 ora di trabou pa komunidat.
Hues Snitker den su desishon a splika e akusado ku ámbos mester di guia di profeshonalnan pa desaroyo di nan yu i tambe pa e hòmber por asumí e papel di tata manera mester ta.
Sin violensia òf problema.
Mirando tur esakinan hues a bai di akuerdo ku e demanda di fiskal di 30 ora di trabou pa komunidat, mas guia di Reclassering , training di FMA i guia di profeshonalnan pa tin un bon komunikashon i relashon familiar.