WILLEMSTAD.- E hòmber W. Coffy (59) mester bai sinta 18 luna den prizòn pa un akusashon di mas di 5 kilo di koka ku e ta keda akusá di dje.
Ministerio Públiko ta akusá Coffy di a trata na eksportá un total di 5430 gran di koka pa Boneiru den un pakete dia 10 di mart 2020.
Relashoná ku esaki fiskal a pidi hues Verbeek pa manda Coffy inmediatamente prizòn, pero hues a tene kuenta ku su edat i tambe promé bes ku e ta kai den man di hustisia.
Coffy ayera a presentá den sala di korte pa responsabilisá su mes pa su akto.
Coffy tabata traha na e kompania di karga Don Andres pa 26 aña.
E dia en kuestion Coffy a trese e pakete trabou pa mand’é Boneiru.
Coffy a bisa ku e no tabata sa ku den e pakete ta’tin koka, sino komestibel.
El a splika ku dos dia promé un hòmber deskonosí pe a presentá na su kas i a puntr’é si e ta traha na Don Andres.
Ora el a bisa e hòmber si, e hòmber a pidié pa por hasié un fabor dor di hiba e kaha su trabou pe, pa manda Boneiru.
Segun Coffy e ta pensa dor ku e hòmber no tabatin transporte pa e mes bai, el a disidí hasié e fabor mirando ku ta trabou e ta bai. Siguiente dia el a pasa buska e kaha serka e hòmber den outo di un amigu. E hòmber a bisé ku despues e lo pasa paga i duna e adrès korekto ku e kaha mester bai.
Ora el a yega trabou, el a hinka e kaha den kantina pendiente e pago i e adrès.
Hues a bisa Coffy na polis el a deklará ku el a kere ku ta mariwana.
Segun e prosèsverbal, Coffy a deklará ku e mener ku a bin su kas a bis’é ku tin un tiki kos den e kaha i el a kere ta mariwana.
Coffy na su turno a splika ku esei no ta bèrdat.
Hues a puntra Coffy si e no a haña straño ku un deskonosí ta bin su kas i pidié pa hiba kos pe. Tambe hues a haña straño kon e deskonosí por sa unda e ta biba.
Coffy a bisa tin hopi hende sa ku e ta traha na Don Andres.
Segun e prosèsverbal di polis, e dia ei nan a mira riba kámara e outo blanku ku e akusado a bin kuné. Den e outo tabatin dos hende mas. Coffy a bisa ku ta doño di e outo tabata kuné.
Fiskal na su turno a duna di konosé, ku na polis ora e reshèrshinan a bisa Coffy ku si ta mariwana tin den e kaha e peso ta hopi, Coffy a bisa, ku e no sa kuantu kokaina lo tabatin den e kaha.
Riba esaki Coffy a ninga redondamente di a bisa esei. El a splika, ora polis a arest’é, el a spanta i puntra polis si ta mariwana tin den e kaha. Segun Coffy niun momento el a papia di koka.
Fiskal a bisa kolega di e akusado a mira ku e dia ei, el a hiba e kaha den magazine i no den kantina manera el a bisa. Segun fiskal no tin motibu pa su kolega gaña riba dje.
Doñonan di e kompania a haña ku e kaha tabata demasiado pisá i a disidí di habrié. Ora nan a habrié nan a mira 5 pakete pretu den un “rice cooker” ku a resultá di tabata koka.
Fiskal ta haña un hòmber ku a traha 26 aña na un kompania di transportá karga, mester por sa ku e tin ku kontrolá un kaha prinsipalmente si el a hañ’e serka un deskonosí.
Mirando tur esakinan fiskal a haña e akusashon kompletamente probá i a demandá Coffy na 24 luna di kual 6 kondishonal i a pidi pa arest’é mes ora.
Abogado Kid Martina a bisa den su defensa, na Kòrsou ta masha normal si bo sa un hende ku ta traha na por ehèmpel banko, pidié pa atendé asuntu di su karchi pe.
Segun e abogado meskos a pasa ku esun ku a pidi Coffy pa hiba e kaha pe.
E abogado a bisa ku ta mas fásil pa kastigá esun ku a hiba e pakete, ku esun ku a duna e pakete.
Hues den su desishon a bisa Coffy ku den su benefisio ta ku e tin kasi 60 aña i ku nunka el a kai den man di hustisia p’esei e no ta laga arest’é mesora.
Segun hues, por ta nan a abuzá di su funshon òf di su persona òf e ta kere den hende muchu lihé. Pero echo ta ku el a kometé un akto i ku e ta bai di akuerdo ku e demanda di fiskal.