WILLEMSTAD.- E hòmber M. Seintje (68) kondená na kastigu kondishonal, despues ku el a keda akusá di a hinka su víktima ku un kuchú dia 27 di aprel último.
Segun e akusashon, e akusado a hinka e víktima vários bia di kua el a haña hinkánan na parti di su man ariba.
E dia ei e akusado i su señora tabata na un fiesta di selebrashon di 70 aña ku a kaba na hinkamentu.
Dado momento a surgi un diskushon entre e akusado i su señora i a trata na agredí esaki. E víktima mes ora a kai aden i a bisa e akusado ku e no por permitié agredí su señora, su dilanti.
Segun e akusado, e víktima ta esun ku a kana bin riba dje menas’é i bis’é ku e lo tir’é.
El a sigui bisa ku e hòmber a dal e skòp, saka un kuchú kual el a logra kita e kuchú fo’i dje, pero durante un forsageo e kuchú mester a kòrt’é na su man.
E akusado a bisa ku despues e no sa mas kiko a pasa.
El a ninga di ta esun ku a bin ku e kuchú. El a bisa ku e no sa unda e kuchú a sali mes.
Hues a relatá na e akusado ku e víktima a deklará ku el a mira kon e ta saka e kuchú for di su saku. El a bent’é abou, agredié pa despues kai sinta riba dje i hink’é na su man.
Seintje a keda bisa ku esei no ta kuadra pasó niun momento e tabatin kuchú. P’esei e tambe ke sa unda e kuchú a sali.
Na polis e señora di Seintje a deklará ku no ta promé bes ku su esposo ta aktua asina.
El a splika ku ora e bira fuma e ta bira agresivo i por kometé agreshon.
Segun e señora, den pasado tambe el a yega di aktua asina, pero nunka a hasi denunsia kontra dje.
Mas aleu e kasá a sigui deklará, ku e akusado a hinka e víktima dos bia na parti ariba di su kurpa. E mester a keda transportá pa hospital pa haña tratamentu médiko mas avansá.
E víktima a bisa ku e ta hür kas serka Seintje i sa presis di su komportashon pasó nan tur ta biba den mesun kurá. Fiskal a haña e akusashon proba a base di e heridanan ku e víktima tabtin i tambe di e deklarashonnan di vários testigu ku a mira kiko a pasa i tambe di e akusado su mes kasa. Mirando tur esaki fiskal a demanda e akusado na 180 dia di kual 143 dia kondishonal mas un periodo di prueba di 2 aña i guia di Reclassering.
Abogado mr Dickens a pidi hues pa tene kuenta ku e edat di e akusado i tambe ku ta promé bes el a kai den man di hustisia.
Hues Verbeek a bisa den su desishon, ku e ta bai kompletamente di akuerdo ku fiskal. Segun hues e ta konvensí ku ta e akusado tabata esun responsabel pa e kuchú apesar ku e no ke atmití. Hues a haña ku e akusado a sinta sufisiente den prizòn. El a bai di akuerdo ku e demanda, guia di Reclassering i tambe guia di FMA pa uso di alkohòl.