WILLEMSTAD.-  Hues Edelenbos ayera a kondená e akusado Vencente Paz (29) na un kastigu di 20 luna di kual 6 kondishonal ku un periodo di prueba di 3 aña.

Hues a indiká  ku ta  pa promé biaha ku Paz ta hañ’é den problema ku hustisia.

Ministerio Públiko ta akusá Paz pa plantashon di mariwana den e periodo di 1e di aprel te ku 23 di mei 2018, poseshon di arma di kandela i poseshon di droga i ladronisia di koriente.

Ta trata di 316 mata di mariwana di kual 59 ya tabatin tòp ku ta kastigabel pa lei.

E akusado ayera a presentá den sala di korte pa responsabilisá su mes pa su akto.

Hues Edelenbos a duna di konos’é ku tur kos a kuminsá  16 di aprel via un tep anónimo ku polis a risibí.

Segun e informante ku tin un hòmber na tal adrès  ku tin un plantashon di mariwana i tambe arma di kandela.

Relashoná ku esaki, polisnan a hasi nan investigashon i a kuminsá tap kòmbersashonnan di e akusado.

Durante tapamentu di telefòn, polis a skucha vários kombersashon di kual den un di nan el a tende  kon e akusado tabata papia ku un otro akusado, ku ya a keda kondená pa benta di un arma Glock ku lo a kosta 2 mil florin.

Despues di a hasi investigashon miembronan di tim di aresto a bai kas di e akusado pa deten’é.

Na e kas polisnan a tuma nota di e plantashon di mariwana di un forma profeshonal i tambe di kònkelmentu di waya pa hòrta koriente.

Segun e prosèsverbal di polis, manera nan a drenta den e kas, nan a mira e  arma di kandela ku tabata poné riba un kashi den kamber di e akusado i den un otro kamber un total di 23 bala riba  kashi.

E akusado ayera a atmití ku e plantashon di mariwana tabata di dje.

El a splika ku e ta traha bolo ku e zeta di mariwana pa e bende. Segun e akusado e tòpnan di e mariwana e mes ta huma.

El a bisa mas aleu ku e motibu ku el a kuminsá ku benta di e bolo di mariwana ta pasó kaminda e tabata traha a kuminsá bai malu. P’esei el a opta pa kuminsá traha e bolo ku e zeta ku e ta pèrs saka for di e mata.

Pa loke ta trata  e ladronisia di koriente, tambe el a akseptá.

El a bisa ku e ke haña un trabou pa e paga e debe di  mas di 11 mil florin ku Aqualectra  a hiba komo pèrdida, den su kaso.

Pa e akusashon di e arma kandela, e akusado a splika ku na 2016 su tata a fayesé i a laga e arma atras. E tabatin miedu di bai entreg’é pa polis no ser’é.

E akusado a ninga di a bisa na hues komisario ku e tabatin e arma pa defendé su mes, manera hues a relatá.

Fiskal a haña e akusashon probá i a hasi un demanda di 24 luna di kual 6 kondishonal.

Hues na final a desviá for di e demanda di fiskal i a konden’é na e kastigu ariba menshoná  ku un periodo di prueba di 43 aña i a honra e daño perhuisio di Aqualectra.