WILLEMSTAD.- E hòmber Ulrich ‘Uchi’ de Pablo  a keda likidá dia 7 di aprel aña pasá na Weto, na momento ku el a bai kumpra kuminda, posiblemente asesiná pa yalusí.

Durante tiroteo un di dos persona ku no tin nada di aber ku e kaso tambe a risibí bala i a fayesé. Ta trata di e víktima Shurijon  Noor.

Pa ku esaki e hòmbernan Edmar ‘Eto’ Clemencia i  Reymison ‘Chino’ Martina ta keda akusá di ta esnan responsabel pa e akto lamentabel aki.

Clemencia ta enkarselá na Hulanda pa su seguridat, miéntras Martina ta será na Kòrsou i ta wòrdu tres’é korte kara tapá bou di seguridat máksimo di e Tim di Aresto.

Pareha di Clemencia di fam de Meeza ayera a para komo testigu bou di huramentashon.

El a hura ku e lo papia solamente e bèrdat den nòmber di Dios. Hues a bisa de Meeza ku na polis el a duna deklarashonnan amplio i inkriminante kontra di Clemencia.

El a bisa ku despues ku Clemencia a haña vários kombersashon amoroso entre e ku e víktima Uchi i tambe algun video, Clemencia a bis’é ku e lo bai wak kiko lo pasa ku Uchi.  Clemencia a bis’é ku ya su amigunan di pariba a investigá  Uchi pe i a haña sa ku Uchi ta buska outo den eksterior.

P’esei e ta kere ku ta Clemencia lo a usa Chino  ku ta  Remyson pa kometé e likidashon di Uchi.  Segun de Meeza na polis, Chino ta hopi bon ku Eto i ta miembro di Army i  ta sinta tur ora bou di palu. P’esei e ta kere ku ta Eto a dun’e òrdu pa likidá Uchi.

De Meeza a ninga tur esakinan i a bisa ku Chino no ta kapas di hasi algu asin’ei.