WILLEMSTAD – Un hòmber ku heridanan serio i sangramentu pisa mester a risibí asistensia médiko ku urgensia despues di un insidente ku a tuma lugá den Rondeweg na Julianadorp. Te na e momentu aki no ta konosí eksaktamente kiko a sosodé ni kon e hòmber a haña su heridanan.

Segun informashon ku EXTRA a risibí, na un momento dado a drenta un notifikashon tokante un hòmber heridá ku benta abou den kaya. Ora asistensia a yega na e sitio, nan a topa e hòmber ku sangramentu pisa, prinsipalmente na su kabes i área di garganta.

E situashon tabata serio, ya ku e hòmber tabata pèrdè hopi sanger. Segun e informashon risibí, e víktima dado momentu tabata kai den shòk i na diferente momento su komportashon tabata difísil pa kontrolá, loke a kompliká e proseso pa asistié.

Debí na gravedat di e situashon, a pidi asistensia di un segundo ambulans pa yuda ku stabilisashon di e hòmber. Finalmente, personal di ambulans a logra di transportá e víktima pa Curaçao Medical Center (CMC), kaminda e por risibí tratamentu médiko mas avansá.

Te na e momentu aki no ta konosí bou di ki sirkunstansia e hòmber a haña e heridanan. Tampoko no tin konfirmashon ofisial tokante su kondishon aktual. Lokual si ta hala atenshon ku riba un kámara ei banda riba grabashon ta mira e víktima ta kana pasa bon bon. Kiko a pasa un ratu despues di esei ta un misterio te pa e tin buraku na su kabes i garganta.