WILLEMSTAD.- Resientemente e akusado R.L. a keda kondená na 9 luna di prizòn kompletamente kondishonal, ku un periodo di prueba di 3 aña pa pòstmentu di droga.

E ta keda akusá di a trata na pòst un kantidat di 102 gram di koka pa Hulanda den un pakete.

E akusado no a presentá den sala di korte.

Fiskal ku tabatin e akusashonnan den su kontra,  a pidi hues pa dal bai ku tratamentu di e kaso pa motibu ku e akusado a haña  su dagfar den su man.

Pues e tabata bon na altura fecha di e tratamentu.

R.L. a deklará na polis, ku el a haña e pakete serka un konosí di dje pa hasié un fabor. Dor ku e no tabatin su identidat huntu kuné.

Segun e akusado ta trata di un persona ku e sa ta ken i no ta mustra un hende di e kosnan ei. Tampoko e por a pensa ku e lo a lag’é hasi algu asina.

El a bisa ku e konosí aki a pidié pòst e pakete pe, debí ku su sédula a kaduká netamente den e dia nan ei.

Fiskal ta haña e akusashon legal i konvinsentemente probá.

Segun e fenómeno kaminda e akusado ta bisa ku el a hasi e hende un fabor pasó su identifikashon a kaduká ta masha remarkabel.

Segun fiskal esaki ta un rísiko ku e akusado ta tuma riba su mes dor di hasi e tipo di fobornan aki , ku tur e konsekuensia ku esaki por trese kuné.

Fiskal a bisa ku e ta konvensí ku e akusado a pòst e pakete konsientemente.

Mirando esaki fiskal ta hasi un demanda di 9 luna kondishonal ku un periodo di prueba di 3 aña.

Hues den su desishon no a mira motibu pa desviá i ta bai di akuerdo ku e demanda di fiskal.