WILLEMSTAD.- Hues Paulides a posponé un kaso di ladronisia  pa haña mas informashon.

Esaki pa motibu ku e akusado a deklará algun vershon den korte ku no tabata muchu kla pa hues.

Chamir Carti  (25) a presentá den sala pa responsabilisá su mes pa menasa, maltrato i ladronisia ku el a kometé.

Carti  ta keda akusá pa dos echo kastigabel.

Segun Ministerio Públiko  dia 20 di òktober aña pasá Carti a menasá   mama di su yu ku arma di kandela i  tambe ku e palabranan  “lo bo wak kiko ta bai pasa abo i bo outo”.

Tambe e akusado a manda un potrèt di arma di kandela riba e dama su telefòn.

Dia 25 di òktober,  Carti ta keda akusá di a kometé   kiebro i ladronisia den union ku otronan, den un bibienda na Zuurzak, kaminda el a bai ku vários prenda balioso, televishon  apple, paña, kolonia, sèt di radio, bòternan di wiski, lampi, flèshlait i tambe Ipad.

El a hasi esaki dor di fòrsa un porta  i bai aden. Ta trata di e apartamentu di abogado Kostrzweski kaminda ladronnan a bai tambe ku su renchinan di Swarovski.

Remarkabel di e kaso aki ta ku e akusado a “add” e abogado riba Facebook bou di un otro nòmber.

Despues direpente e abogado a nota ku e nòmber a  kambia i bira Chamir Carti.

E loke mas a hala atenshon di e abogado tabata algun artíkulo manera lampi ku el a mira riba e muraya di e akusado su página di Facebook i a rekonosé esaki komo esnan di dje.

Despues ku polisnan a tene un entrada hudisial den e akusado su kas dia 17 di novèmber, nan a haña   Ipad i vários artíkulo mas ku e abogado a rekonosé komo su pertenensianan.

Segun deklarashon di un bisiña, el a mira e akusado bula muraya di e apartamentu   ku dos saku di kompra den su man.

Bisiña a rekonosé e akusado pa motibu ku el hür un apartamentu den e mesun kompleho un dia promé.

Carti a deklará ku en bèrdat el a hür e apartamentu, pero pa dos amigu. Segun Carti, debí ku nan tabata  bou di 21 aña nan mes no por a hür.

E akusado a para riba ku riba e dia ku nan ta akus’é di a hòrta, e no tabata na e kompleho di apartamentu.

Polisnan a konfiská un renchi di Swarovski den kamber di e akusado di kual esaki tambe a keda rekonosé pa e víktima.

Riba esaki e akusado a duna di konos’é ku el a kumpra e renchi na e hoyeria den Punda Meena’s pa mama di su yu i ku esaki no ta di e marka ku e abogado ta pretendé.

Pa loke ta trata e Ipad, Carti a splika di a kumpra esaki serka un adikto pa 150 florin.

Segun Carti ta otro hende a kambia su number riba Facebook.

Pa loke ta trata e akusashon di menasa, hues a duna di konosé ku  e dama víktima a hasi un denunsia, kaminda  el a deklará na polis ku el a keda menasá pa e akusado, despues ku el a terminá e relashon.

E víktima a bisa ku Carti ta hopi agresivo i ònbeskòp.

Hues a puntra Carti si bèrdat el a manda arma di kandela riba app di e dama.

Carti a bisa ku ta e dama mes a fi’é un telefòn i ku den e telefòn aki tabatin potrètnan di arma di kandela.

Segun Carti despues e dama a bin tuma e telefòn bèk.

Hues a splika Carti ku esaki no ta kuadra, pa motibu ku e potrèt ku a keda hañá den e dama su telefòn, a sali fo’i su number.

Hues Paulides a bisa ku e ta posponé e kaso pa motibu ku e ke tende deklarashon di e doño di e apartamentu, e dos amigunan, i tambe mama di su yu pa sa  di e renchi ku a keda hañá durante e entrada hudisial.

Tur e personanan aki mester keda skuchá na hues komisario.

E kaso lo kontinuá dia 11 di ougùstùs próksimo.