Hues  a bis’é ku e ta spera ku su lágrimanan ta di bèrgwensa

WILLEMSTAD.- E hòmber A. Boelijn (37) a presentá ayera den sala di korte akusá di a maltratá 3 diferente dama ku e tabatin relashon kuné den e periodo di 2018, 2019 i 2020. Boelijn tabatin 3 abogado pa hasi defensa pa kada un di e akusashonnan.
E promé dama tabata na aña 2018. Segun deklarashon di e víktima, e akusado a kue tene na su man, dal e, push’é bent’é abou i kibra su telefòn.
Pa loke ta trata e di dos akusashon, e ta keda akusá ku den e periodo di 27 yanüari 2019 te ku 6 di febrüari 2019, el a morde un otro dama (ku e tabatin relashon kuné) den su lomba, dal e un wanta, pone ku e víktima a bai dal su kabes den hèki kurá i frakturá su kabes.
E di 3 dama ku tambe e tabatin un relashon kuné, a hasi denunsia na polis i a deklará ku na aprel último e akusado a agredié i kibra su telefòn.
Pa e promé kaso e akusado a splika ku e dama a yega kas fo’i trabou ku su eks. El a reklam’é i a surgi un problema entre nan dos.
El a bisa ku e tabata asina furioso p’esei el a dal e dama i kibra su telefòn. Riba e pregunta di hues Verbeek na e akusado pa kiko e mester a dal e dama, el a bisa paso e dama a yega di hasi mesun kos un par di bia kaba i el a tah’é, “ma bis’é ku mi no ta hasié kuné, pues no hasié ku mi”.
Segun e akusado e kos a “hurt” e hopi. El a splika ku ta un wanta so el a dal e dama. Hues a kuestioná e dalmentu. “Ma dal e pasó mi tabatin hopi doló pa loke el a hasi. Segun e deklarashon di e dama, e akusado a menas’é kue tene na su garganta, bent’é na suela i sigui dal e.
E akusado a bisa ora el a reklamá, e dama a grit’é ku e no tin nada di bis’é. E ta aseptá ku el a dal e dama un kabisá, nèt ora e tabatin su yu den man. Hues a puntra si esei ta hustifikashon pa agredí un dama.
Pa loke ta trata akusashon di e di dos dama, e akusado a bisa ku esei tabata kasi su pareha. El a splika ku el a pleita kuné, pero e ta rechasá di a usa violensia.
Hues a relatá ku na polis e akusado a bisa ku el a dal e dama un wanta na su banda règt di su kara. Segun e akusado, e dia nan ei e tabatin hopi tenshon di pèrdida di trabou, stress di e relashon ku el a kaba di sali fo’i djei i tambe hopi otro faktor mas ku kisas a pone aktua asin’ei.
E di tres akusashon, e ta keda akusá di a maltratá e di 3 dama.
Segun e dama aki, e tabata den “washok” ora ku el a keda sorprendí pa e akusado. El a splika ku e akusado a ranka e telefòn for di dje i kibr’é. Segun e víktima, el a spanta kore drenta baño pa skonde, pero e akusado a kibra e porta, rank’é i lag’é dal su kabes, bis’é si bo no ta di mi bo ta di niun otro. Segun e akusado e motibu tabata paso e dama a pone un potrèt di e ku un gai brasá den su telefòn ku el a kumpra pe. Ora el a reklam’é, e dama a kuminsá gañ’e yen kos. Esei a pone ku el a rabia i dal e dama.
Hues Verbeek a bisa e akusado ku el a ripara ku tur e bia nan ku un muhé no hasi loke e ke, e ta dal nan. Segun hues e ta kere e problema ta e akusado i p’esei mester buska yudansa pe, pasó un hòmber no tin mag di dal muhé. E akusado mes a bisa ku awor si a yega tempu pa e buska yudansa.
Fiskal den su rekisitorio a bisa pa tantísimo bia ku dal hende muhé no ta aseptabel.
Segun fiskal lo tabata hopi bon pa sa pasado di e akusado i tambe kon el a wòrdu lantá òf ku e ta den un sirkulo visioso i ku esei tin ku stòp awe. Mirando esaki fiskal a hasi un demanda di 6 luna kondishonal ku un periodo di prueba di 3 aña. Durante ku fiskal tabata papia, e akusado tabata awa na wowo.
Hues Verbeek promé di dikta sentensia, a papia serio ku e akusado. El a bis’e entre otro wak pa ta lastu bia ku e ta dal hende muhé.
Relashoná ku e lágrimanan, hues a splika ku e ta spera ku nan tin di aber ku bèrgwensa i tambe ku el a realisá pa stòp di hisa man pa hende muhé. Hues a bai di akuerdo ku e demanda di fiskal i a pidi e akusado pa buska yudansa.