Hòmber ta kometé atrako na toko huntu ku  “transgender”

WILLEMSTAD.-Korte di promé instansia ayera a trata kaso di un duo ku a kometé atrako na toko “Hema” den Brievengat. Ministerio Públiko ta akusá S. K. (25) i J.H.(19) di a hasi e akto aki.

Segun e akusashon, dia 17 yanüari 2021, e duo a presentá na e toko i bou di menasa, a logra bai ku e benta di dia di 150 florin.

Un di e víktimanan doño di e toko, a konta ku e tabata  sintá riba su stupi i direpente el a mira dos hòmber kara tapá, kore yega na e toko ku ta keda pega ku su kas.  Un di e hòmber nan a bula e balustrada bai paden, miéntras e otro a keda pará pafó.

El a mira kon e hòmber ku a bula, a bai serka su kasá den e toko i  pidié pa sèn. E hòmber tabatin su man bou di su suèter i tabata  bisa e  víktima “Keda rùstig Grandi”. Segun e dama víktima, bèrdat nan ta yama su kasa “Grandi” i p’esei e ta kere, ku ta un hende ku konosé nan bon. El a sigui konta, kon el a mira e hòmber kara tapá kue e kaha di sigaria, saka e sèn i kore bai kuné. Segun e señora víktima, ora ku e hòmbernan a kore bai, el a ripará ku un di nan su moveshon, tabata poko femenino.

Un bisiña dilanti di e toko ku a mira tur kos, a sali kore tras di e hòmbernan durante nan huida i ora el a regresá, el a bin ku un di e hòmbernan ku a resultá di ta e hóben akusado J.H.

Ayera durante tratamentu di e kaso, hues a puntra J.H. ku e ke pa e wòrdu trata komo un dama òf un kabayero, mirando ku den su rapòrt ta bisa ku e ta den proseso pa bira “transgender” i korte ke respetá esei. J.H. na su turno a skohe pa trat’é komo un persona femenino.

Mas aleu hues a bisa ku J.H. a atmití na polis, ku el a kometé e akto huntu ku S.K. .

J.H a bisa den su deklarashonnan, ku el a bai di akuerdo pa kometé e atrako, pa motibu ku e tabatin hamber i tabatin mester di sèn.  Fo’i su 12 aña su mama a sake fo’i kas, ora el a haña sa ku e tabata homo. E mes mester a sòru pa sobrebibí tur dia.  El a bisa ku e dia ei, promé ku e atrako, el a bai kas di S.K. i huntu nan a dal píldora di XTC. Esei a pone ku el a disidí di kometé e akto, sin sa kiko e tabata hasi.

S.K. na su turno a ninga tur kos. El a bisa ku e tin un buraku na su pia, ku ta pone ku e no por a kore. Pues ta imposibel ku el a kometé atrako, te pa e kore bai despues. Na promé instante S.K. a ninga di ku e no konosé J.H.

Despues ku polis a konfront’é ku deklarashonnan di un dama ku ta prima di J.H., S.K. a bisa, ku ta despues di a tende fam di e dama, el a bin bei ta ken nan ta.

El a splika ku bèrdat e konosé e prima di J.H.   Segun e akusado, e dama tabata ke un relashon kuné, pero dor ku e dama su kabes ta habrí, e no ke tin nada di aber kuné. E ta kere tantu J.H. komo su prima, mester bai un sikólogo.

E ta pensa ku paso el a rechasá di tin algu ku e dama, tabata e motibu ku e dama i J.H. a bai gaña riba dje pa ser’é.  Segun e akusado, e ta e úniko ku ta  kuida su mama ku ta malu i tambe sòru pa kas i no por kai será pa kos ku e no a hasi.