WILLEMSTAD.- Ayera mainta a tuma lugá un kaso basta lamentabel kaminda un hòmber a drenta den un ofisina di dòkter i menasá su èks pareha ku un arma di kandela i pa despues somentá.

Alrededor di bintisinku pa nuebe di mainta, Sentral di Polis a risibí informashon di un kaso di tiramentu ku a tuma lugá na un Sentro Médiko na Montaña. For di investigashon preliminar a sali na kla ku un hòmber, eks partner di un dama a yega na e Sentro Médiko, saka arma di kandela i dirigí esaki riba su èks partner.

E momentu ei e dama a kore sali for di e edifisio miéntras ku e hòmber a bai su tras pa despues drenta su vehíkulo i bai for di e sitio. Na e sitio polis a haña un bala skèrpi i a konfiská esaki. Ambulans a presentá na e sitio pa duna asistensia na personanan ku tabata den e Sentro Médiko.

Algun ratu despues polis a risibí informashon ku tin un vehíkulo riba brùg i ku e shofùr tin ménos bon intenshon. Na yegada di polisnan a konstatá ku ta trata di vehíkulo di e hòmber sospechoso. Tabatin rumor ta kore ku e hòmber a bula for di brùg miéntras ku otronan tabata bisa ku el a drenta un otro vehíkulo i bandoná e sitio. Te den oranan di anochi polisnan no a lokalisá e hòmber aki.

Den e vehíkulo ku a keda atras riba brùg a konfiská e arma i tambe algun bala skèrpi. Reshèrshi di VVC ta kontinuá ku e investigashon.