WILLEMSTAD.- Korte di promé instansia ayera a trata un kaso di malversashon.
Ministerio Públiko ta akusá e hòmber J. Weert (38) di a hòrta basta prenda di e pareha di su tata, señora Sling, den e periodo di 8 di yanüari 2017 te ku 20 di aprel 2018.
Hues de Kort a splika ku e señora mester a bai hòspital den e tempu ei i tata di e akusado a konseh’é pa no bai i laga tantu prenda den kas. E señora a bai di akuerdo i a duna e tata e prendanan tene pe. E tata na su turno a duna su yu ku ta e akusado, e prendanan warda, pero e akusado a kue e prendanan di e señora bai pant nan.
Weert ayera a presentá den korte pa responsabilisá su mes pa su akto. El a atmití di a kue 1 kadena i 2 armbant bai pant na dos diferente "pandhuis". El a bisa ku el a hasi esaki debí ku e tempu ei e no tabatin trabou i su yunan tabatin mester di algun kos.
El a pensa ku ora e haña djòp e ta bai tuma e oronan bèk.
E señora a bai polis pasó no por a haña e akusado pa e duna kuenta i rason.
Polis dado momento a logra haña Weert i el a primintí ku e ta buska e oronan i duna e señora nan bèk. Atrobe no a tende nada mas di dje i polis a bolbe busk’é. El a bai warda di polis i firma un deklarashon ku ta bisa di a bai hiba un armbant i un kadena di oro na dos diferente "pandhuis" i ku e lo bai buska nan.
Segun e akusado, e mester a paga un total di 1700 florin i algu pa haña nan bèk.
El a firma ku e lo bai buska nan i a firma tambe e kondishon ku si e no hasié e lo wòrdu persiguí pero no a kumpli.
Segun Weert, el a keda detené i ora el a sali e dianan a pasa ku e no por tuma e oro nan bèk.
Hues de Kort na su turno a puntra e akusado si el a pidi e señora despensa. Segun e akusado e no a hasié, pasó e no tabata sa kon duna e señora kara. Hues a bis’é ku e señora ta sintá su tras i ainda por pidié despensa. Dado momento e akusado a bira i a pidi e señora despensa. El a puntr’e si nan por drenta un areglo di pago. E señora a kontestá ku e no tin nada mas di papia kuné, pa motibu ku el a kibra e konfiansa i e ke su kosnan bèk. Mas aleu e señora a bisa ku tin mas prenda ku e no a haña. Fiskal a duna di konosé ku na total e akusado a pant 17.4 gram di oro na un di e "pandhuisnan" i 39 gram di joya na otro "pandhuis". Na tur e tin ku paga 1728 florin.
Fiskal Dennaoui- simons durante su rekisitorio a bisa ku e akusado a kibra e konfiansa den famia i joya tin balor pa hende ku a traha duru i yega na nan kosnan i tambe tin balor emoshonal.
Fiskal a konsiderá e akto aki pió ku drenta den kas i bai ku e oronan.
Segun fiskal e no ta kere ku e akusado tin duele di loke el a hasi, debí ku ta hues a bis’é pa pidi e señora despensa.
Segun fiskal banda di e kaso aki tin un otro kaso di ladronisia na 2019 ku e akusado a keda kondená pe.
Mirando tur esakinan fiskal a yega na un kastigu di 2 luna kondishonal pasó el a tene kuenta ku e kastigu eksistente, sino e lo tabata mas haltu.
E señora a pidi un daño perhuisio di 5300 florin.
Hues a haña e akusashon probá i a bai di akuerdo pa redusí e montante na 3500 florin pa motibu ku tabatin algun prenda ku e víktima no a logra pone riba e lista. E akusado mester paga denter di 6 luna na OM, sino e tin ku sinta e dos lunanan kologá riba su kabes.