El a primintí ku nunka mas e lo bolbe kometé e akto aki

WILLEMSTAD.-  E  hòmber L.W.(28) ayera a presentá den sala di korte, akusá ku dia 20 di mei último  e tabata drai rònchi i pone “fever” den su  vehíkulo marka Mustang, ku e konsekuensia ku el a dal den un otro outo  di marka Spark i  tambe kontra di un pila di betòn  riba F.D.Rooseveltweg, na altura di e kantor di number.

E akusado ku a presentá ayera den sala di korte i a atmití su kulpa. El a konta ku riba e dia ei e tabata na kaminda pa bai kumpra tayer nobo pa su outo, ora el a mira un bon chèns pa e pone “fever”. El a pensa ku e tereno tabata unu privá  i el a probechá. Durante tratamentu di e kaso, e akusado a lamentá e suseso, pa motibu ku normalmente e no sa hasi e tipo di  kosnan aki ku outo.  Semper ta modelá e sa modelá ku outo. E tabatin nèt 1 luna ku el a kumpra e outo  i e siguiente siman e lo mester a bai un show di outo na Waaigat.

Mas aleu e akusado a duna di konosé ku na momento ku el a aksidentá , su outo tabatin seguro, tur kos tabata na òrdu pero su reibeweis so e no tabatin huntu kuné. Ayera el a presentá ku tur su dokumentonan pa prueba esaki. Fo’i dje dia di e insidente, polis a konfiská e vehíkulo i e no a hañ’e mas.

Fiskal  den su rekistorio a splika ku  aki na Kòrsou e fenómeno di pone “fever” riba kaminda públiko, ta alarmante. Esaki ta algu peligroso ku tur e konsekuensianan ku e por trese kuné manera den e kaso aki, kaminda ta dal den un otro vehíkulo ku tabata para den un lugá di parker.  Segun fiskal e bia aki e daño no tabata konsiderabel i no tabatin herido, pero meskos e por tabata fatal tambe.

Fiskal a haña e akusashon probá i a yega na e demanda di 1000  florin kondishonal, mara na 3 aña di prueba. Banda di esaki e akusado por haña su vehíkulo bèk, pero den 3 aña ku bolbe hañ’e ta drai rònchi òf pone “fever”, polis ta konfiská e vehíkulo i e bia aki si e lo no a hañ’e mas. E akusado a haña esaki un bon idea, ya asina e ta siña su lès i nunka mas ta kometé e tipo di aktonan aki mas.  El a bisa ku nunka mas e lo pone “fever.” Wes na final a haña e akusashon probá i a bai kompletamente di akuerdo ku e demanda di fiskal.