Testigunan a mira sospechoso hui for di e sitio

WILLEMSTAD.- Uao di arma di kandela a bolbe hala atenshon ayera riba nos isla. Esaki tabata e kaso ora ku den oranan di atardi alrededor di 5 pasá di 6, Sentral di Polis a risibí diferente yamada di un kaso di tiramentu ku a tuma lugá den Kaya Fin Fin.

E promé unidat ku a yega na e sitio, a topa un hòmber ku herida di bala na e parti ariba di su kurpa.

Mesora a pidi presensia di ambulans ku a yega na e sitio i a transportá e víktima pa sala di Emergensia di C.M.C.

For di investigashon preliminar, testigunan a deklará ku despues ku nan a tende tiru, nan a mira un hòmber sali na kareda na pia hui for di e sitio.

Investigashon den e kaso aki ta kontinuá.