Miéntras víktima ta bisa ku hòmber a atrak’é kita su arma i tir’é: Kaso posponé

WILLEMSTAD.- Kaso di e akusado G. Revierre(25) a bolbe keda tratá pro forma.

Revierre ta keda akusá pa intento di asesinato, maltrato severo, atrako i uso di arma riba su víktima.

Segun e akusashon, dia 4 di sèptèmber 2020, Revierre a tira diferente bia riba su víktima ku un arma di kandela.

Tambe e ta keda akusá di a bai ku 30 mil florin di e víktima. El a menas’é i den un tono agresivo a bis’é "Bo sa kiko e kos aki ta?" "Glock" i a lòs un tiru dirigí riba dje.

Despues el a dal e víktima ku un opheto duru i den un tono agresivo el a keda puntr’é "Unda e sèn ta", "Unda e sèn ta"? i obligá e víktima dun’é tur plaka.

Revierre ta keda akusá tambe pa poseshon di arma kandela.

Durante tratamentu di e kaso hues  a bisa ku polisnan a haña basta huls na e sitio. E víktima tabatin heridanan di bala. Durante deklarashon na polis, e víktima a bisa ku Revierre kier a atrak’é i a kita su arma fo’i dje i tir’é. Revierre a deklará ku e víktima a pidié pa tene relashon seksual kuné i p’esei el a kita su arma i tir’é.

Hues a bisa ku na e sitio polisnan a konstatá rastronan di droga i ta pensa ku ta henteramente otro kos a sosodé di loke ámbos ta deklará.

Segun hues loke tantu e víktima komo e akusado a deklará no ta kuadra ku otro.

E kaso ayera a bolbe wòrdu posponé pa yüli binidero.