WILLEMSTAD.- Den e kasonan di “Hato zaken”, e akusado K.M. ta keda akusá di a ordená su pareha pa pòst un pakete, ku despues a resultá di tabatin 873 gram di koka aden.
Na polis el a bisa ku su primu a yam’é fo’i Hulanda i bis’é pa bai tuma un kaha serka un persona pòst e pe.
Segun e akusado e no por a maginá ku su propio primu lo a hasi algu asin’ei kuné.
El a bisa dor ku e i su primu tin un bon bant ku otro el a konfia den dje i tuma e kaha pe tòg.
Fiskal den su rekisitorio a duna di konos’é ku e loke e akusado a deklará por ta posibel, pa motibu ku en bèrdat ta trata di un famia i ku no mester tin duda pa hasié un fabor. Pero apesar di esaki e akusado mester a kontrolá tur kos bon.
Fiskal a bisa, mirando esaki e ta demandá e akusado na 6 luna di kual 3 kondishonal. Tambe fiskal a hasi demanda di 200 ora trabou pa komunidat.
Hues den su desishon a bisa ku por ta lógiko ku e akusado a konfia su primu, dor di tuma un pakete pa pòst serka un deskonosí pe.
Pues no por proba ku e akusado tabata sa di algu di e pakete.
Mirando esaki hues a bai kompletamente di akuerdo ku fiskal.
Hues a bisa e akusado ku nan ta bai dun’e un chèns i ku esaki mester ta un atvertensia pe, pa otro bia e tuma desishon pa pòst kualke pakete pa un persona ken ku e ta, e mester wak mas mihó i kontrolá e pakete.
Mirando tur esakinan hues a honra e petishon di fiskal.