WILLEMSTAD. - Fiskal a pidi un kastigu di 12 luna prizòn pa Andey Felicia saliendo for di e punto di bista ku e kastigu largu ku el a sinta den pasado, ku e no a siña nada di dje. Fiskal ta konsiderá Andey komo un residivista tambe.
Hues ta haña ku e demanda ta na su lugá, pero e echo ku e kastigu ku el sinta ta 8 aña pasá, hues no ta konsider’é komo un residivista i ta konden’é na 12 luna di kua 3 luna kondishonal i 3 aña di prueba.
Andey ta kai den brasa di hustisia despues ku servisio di inteligensia di polis ta haña informashon ku un tal ‘Boeis’ ku ta biba na Sto. Domingoweg lo ta negoshá den droga, esta bende droga i ta den poseshon di arma di kandela.
E tim di opservashon di polis a kuminsá opservá e kas pa saka afó ta ken e tal ‘Boeis’ aki ta i nan a kai ariba ku ta trata di un persona konosí pa polis i ku tin un karchi di kastigu largu i den pasado tabata kondená pa poseshon di arma di kandela i tambe intento di asesinato. E último kastigu ku el a sinta ta na 2008 kaminda ku el a keda kondená na 24 luna pa su embolbimentu den trafikashon di droga.
Esaki a pone ku dia 25 ougùstùs, polis a realisá un entrada hudisial den kas di Andey i a haña un arma di kandela Glock mas 120 bala di diferente kaliber. Ta parse ku Andey tin un negoshi di benta di arma i bala.
Andey a splika hues ku el a tuma e arma di kandela i e balanan den beslag for di un venezolano. Ora ku e venezolano paga e lo a debolbé e armanan.
E historia di venezolano, fiskal ni hues no a kere, fiskal ta di opinion ku Andey ta negoshá den munishon pa arma di kandela i e tabatin 120 bala, di diferente kaliber, esta di kaliber abou te pa arma hopi pisá.
Den pasado el a keda kondená pa arma kaba, intento di asesinato, droga etcetera i a yega di sinta un kastigu di no ménos di 8 aña.
Esakinan tur huntu fiskal ta kere ku 12 luna flèt ta bon pa Andey den e kaso aki, pero hues a yega na un kastigu di 12 luna di kua 3 luna kondishonal i 3 aña di prueba.