Defensa propio probá

WILLEMSTAD.- Hues de Kort  ayera a bai di akuerdo ku fiskal Niks i apsolvé Pedro Aceituno (46) nasé na Venezuela for di tur kulpa.

Aceituno ta keda akusá di a mata e hòmber Dennick Corsica, nasé na Kòrsou dia 10 di mei 1977 den e mardugá di 10 di òktober 2020.

Corsica ta e konosido adikto ku ta kana pidi sèn den Punda.

Ayera e kaso mester a wòrdu tratá integralmente pero despues di e rekonstrukshon, fiskal ta konvensí ku  Aceituno a aktua a base di defensa propio.

E kaso a keda tratá anteriormente, pero pa korte no tabata muchu kla kon e kosnan a bai, debí ku e akusado no tabata kòrda tur e momentonan ei.

Dia 5 di febrüari último korte huntu ku Ministerio Públiko a hasi un rekonstrukshon.

Fiskal Niks a bisa ayera ku a base di e rekonstrukshon, kombiná ku e imágennan di kámara,  hopi kos a bira muchu mas kla.

Aceituno a konta ku e dia ei el a sali fo’i Otrabanda i tabata kanando ta bai su kas na Skalo  den oranan di mardugá na pia.

Ora ku el a yega Skalo banda di Biblioteka, Corsica a sali direpente riba dje ku un kuchú den man i pidié sèn.

Aceituno a kue un piedra manda riba Corsica i sigui kana. Kanando ta bai Corsica a bolbe bin su tras.

Corsica a manda un bòter bashí di serbes den  direkshon di e akusado. Esei a pone ku e akusado a kue un baranka di piedra i mand’é kuné.

Riba kámara por a mira ku e akusado a kana bai i kasi no por a mir’é mas den imágennan.

Ora ku e akusado a kana bai, Corsica a kore bai su tras. Despues ku el a yega serka e akusado el  bolbe trata na atak’é.

A surgi un forsageo entre nan dos, di kual Corsica a saka kuchú riba e akusado i a hink’e na altura di su garganta.

Einan e akusado a purba kue su man tene i e kuchú a hinka su mes. Durante e forsageo tur dos a kai riba otro i ámbos tabata tur na sanger.

Aceituno mirando ku Corsica a hink’é i ketu bai tabata trata na hink’é ku e kuchú, a kue un baranka di piedra i dal e den su kabes. Corsica tabatin 14 herida na su kabes.

E akusado na vários okashon a keda bisa ku e no a bati e hòmber pa e muri i no a pensa ku e lo a muri.

Fiskal a bisa ku den promé e tabatin hopi duda i asta tabata pensa dikon e akusado no a kana bai laga Corsica.

Pero despues di e rekonstrukshon i imágennan di kámara, por a mira ku kada bes ku e akusado kier a kana a bai, Corsica tabata bai su tras i purba atak’é.

Corsica a saka kuchú  i a hink’é.

Esei a pone ku e mester a defendé su mes.

Mirando tur esakinan fiskal a bisa ku Aceituno mester wòrdu deklará liber.

Hues den su desishon a bai kompletamente di akuerdo ku fiskal.

Na momento ku Aceituno a tende esaki e no por a stòp di yora i a keda yama Dios danki.

El a bisa ku su intenshon no tabata pa mata e víktima, pero si e lo mester a sinta e kastigu lo el a respetá lei.

...Abogado mr Ayubi ku ayera a logra defensa propio pa su kliente...