Un hòmber venezolano a presentá dilanti wes pa responsabilisá su mes pa un kaso di infrakshon di tráfiko ku el a kometé.
Segun e prosèsverbal dia 26 di febrüari último e tabata kore riba kaminda públiko, manehando un vehíkulo sin e dokumentonan nesesario. E tabata riba Caracasbaaiweg na momento ku outoridatnan polisial a par’é pa despues tuma nota ku e no tabatin su karchi di kùr ni su seguro na òrdu.
Segun e akusado, el a kaba di kumpra e outo i pa algun motibu, ainda e tabata den proseso pa kaba di atendé ku algun trámitenan nesesario. E kosnan no tabata kompletamente kla i p’esei e no por a disponé tampoko di e dokumentonan nesesario. Fiskal a demandá e akusado na un but di 400 florin pa su seguro, mas un but di 150 florin pa su karchi di kùr, pues na tur 550 florin.
Wes den su desishon a bai di akuerdo ku fiskal i a bisa ku e akusado por paga den término di 6 biaha, esta 5 biaha 100 florin, mas 1 biaha di 50 florin.
E akusado a bai di akuerdo i a primintí di lo paga e but, sino e lo mester sinta un kastigu di 11 dia den prizòn.