WILLEMSTAD.- Korte di Dordrecht a kondená e yu’i Kòrsou Sybran B.(33) na 18 aña kastigu pa asesinato di Orcino “Enchi” Alberto ku tambe ta yu’i Kòrsou asesiná dia 6 di novèmber 2019 na Putsebocht Rotterdam.
Korte a haña e akusashon probá. Segun e veredikto e akusado a los 14 bala riba Alberto ku a kousa su morto inmediatamente.
E víktima tabata sintá e dia ei den un outo ku bentana i portanan será. Na momento ku e akusado a sorprendé, e víktima no tabatin chèns pa kore bai. E tiroteo a tuma lugá riba kaminda públiko, mei mei di un bario drùk ku tin hopi bibienda.
Aparentemente e motibu di e likidashon tabata paso e víktima a “add” e partner di Sybran riba Face Book komo amigu i a manda mensahe pe.
Korte a bisa ku nan ta tuma e akusado hopi na malu si realmente esei tabata e motibu prinsipal ku el a pasa kue su arma di kandela pa bai regla kuenta ku e víktima.
Mas aleu Korte a bisa ku e ta haña e kaso aki èkstra doloroso pa famianan di e víktima, paso Sybran no a tuma responsabilidat pa loke el a hasi.
Mas bien el a trata na tira falta riba e víktima, insistiendo ku e no por a hasi nada otro ku tre di aserka. Segun e veredikto, e akusado no ta mustra preokupá pa e situashon i tampoko nan no a nota arepentimentu ingenuo pa e famianan di e víktima.
Segun korte, Sybran ainda no a realisá ku el a mata un persona i kon doloroso esei ta pa e famianan ku a keda atras.
Mirando esaki e tribunal a bai di akuerdo ku daño perhuisio ku a suma mas di 95 mil 600 euro òf 365 dia será.