WILLEMSTAD.- Bario di Seru Fortuna a subi bandera pa promé biaha riba dia di outonomia di Kòrsou, den un seremonia Solem. Fundashon Komishon di Bario Seru Fortuna ( FKBSF) huntu ku Komishon Hala Fa Mara a organisá e dia aki pa e bario.  Komishon Hala Fa Mara ta traha riba proyektonan spesialmente pa e parti di Fortuna Ariba.

Durante e seremonia a duna honor na algun baluarte di bario ku tabata presente. E aña aki a nombra sra. Lisa Cathalina baluarte di bario i a toka honor na dje pa dirigí su mes na e bario. Su mensahe tabata pa mas habitante kontribuí na desaroyo di e bario.

Tambe bario a duna un kariño chikitu na algun ‘service clubs’ komo gratitut pa e proyekto 'Mi Ta Care Pa Bo'. E regalito tabata yabero ku e abitantenan mes a traha for di algun palu di ‘neem’ di den e bario.

Despues dje seremonia algun mucha a hunga bala riba e vèlt na Fortuna Ariba kaminda e bandera a keda waya den un bunita shelu blou.

Riba e kombinashon di fotonan parti di e selebrashon i por mira tambe e baluartenan entre nan sra. Lisa Cathalina ku a keda homenaheá.